वीरगंज महानगरपालिकाको सील गरिएका क्षेत्रबाहेक अन्यत्र अत्यावश्यक सामानहरूको खरीदारीमा खुकुलो गरिएको छ।
चैत २९ गतेदेखि सील गरिएका वडाहरू १, २, ३ र १६ बाहेक अन्य वडाहरूमा अत्यावश्यक सामानको खरीदारी तोकिएको समय बिहान ११ देखि ३ बजेसम्म खुकुलो पारिएको छ। मानिसहरू खाद्यान्न खरीदको लागि यो समयमा शहरको तोकिएका पसलहरूमा मापदण्ड अनुसार भीड लाग्ने गरेका छन्। वडाका भित्री भागहरूमा रहेका पसलहरू सञ्चालनमा रहेकाले त्यहाँ नपाइने सामानहरू शहरको बिर्ता, अलखियारोड, आदर्शनगर, गीतामन्दिर, घण्टाघर, मुर्ली, श्रीपुर क्षेत्रमा खरीद गर्नेहरूको भीड हुने गरेको छ। सामाजिक दूरी बनाएर पसलमा सामान खरीद गरिरहेका छन्। यसैगरी, लकडाउन अवधि बढेसँगै वीरगंज बजारमा अन्य पसलहरू पनि बिस्तारै खुल्नेक्रम जारी छ। बिर्तादेखि श्रीपुरसम्म दिउँसो मानिसहरूको चहलपहल बढेको छ। घण्टाघरस्थित विपी पार्कमा मात्र ट्राफिकले सवारी जाँच गरिरहेको छ। त्यसबाहेकका क्षेत्रमा मोटरसाइकल, साइकलको सङ्ख्या बिस्तारै बढिरहेको छ। अस्पताल, बैंकमा मोटरसाइकलको भीड देख्न सकिन्छ।
माईस्थान र सील क्षेत्रमा कडाइ
वीरगंजको माईस्थान, मीनाबजार क्षेत्र र सील गरिएका चारवटा वडामा भने कडाइ गरिएको छ। माईस्थान, मीनाबजारमा मानिसहरू खाद्यान्न, तरकारीलगायतका सामानहरू खरीद गर्न भीड लाग्ने गरेको र सामाजिक दूरी कायम नगरिएकोले प्रशासनले एक साताअघि लगाएको रोक कायम छ। त्यहाँ सामान खरीद गर्नेहरूको लागि पसल सञ्चालकहरूसँगको समन्वयमा होम डेलिभरीको व्यवस्था गरिएको छ। वैशाख १४ गते सील गरिएको वीरगंज–३ र १६ वडामा थप दुईजना कोरोना सङ्क्रमित फेला परेपछि यी वडामा कडाइ गरिएको छ। छपकैया र इनर्वामा प्रशासनले सङ्क्रमित फेला परेपछि बिहानदेखि पसलहरू बन्द गराएको छ भने मानिसहरूको हिंड्डुलमा पनि रोक लगाएको छ।
छपकैयामा सङ्क्रमितका परिवार, भेटघाटमा रहेका मानिसहरू गरी ९४ जनाको दुई दिनमा स्वाब नमूना परीक्षणका लागि सङ्कलन गरेपछि मङ्गलवारदेखि मानिसलाई अत्यावश्यक सामानको खरीदारीमा केही खुकुलो पारेको छ। वडाका पसलहरू बन्द गरेपनि सहायक बाटो, मेनरोड र अन्य वडाहरूमा गएर दूध, खाद्यान्न, तरकारी खरीदका लागि खुकुलो गरिएको छ।
