जेलको स्वास्थ्य केन्द्र चल्यो

प्रस, परवानीपुर, १५ पुस/
    वीरगंज कारागारममा ५ वर्ष पहिले निर्माण भएको आचार्य तुलसी स्वास्थ्य उपचार केन्द्र सञ्चालनमा आएको छ । वीरगंजका चिकित्सकहरूको टिमले प्राविधिक सहयोग गर्ने प्रतिबद्धता जनाएपछि उपयोगविहीन बनेको केन्द्रले सेवा दिन थालेको छ ।
    आज एक कार्याक्रमका बीच पर्साका प्रमुख जिल्ला अधिकारी नारायण भट्टराईले केन्द्रको सेवा शुरू भएको घोषणा गरेका थिए ।
    शनिवार वीरगंज कारागारका ६ जनाको आज ओपिडीमा चेकजाँच गरी औषधि उपचार गरिएको चिकित्सक टोलीका डा. उदयनारायण सिंहले बताए । चिकित्सकहरूको टिममा डा. दिलीप चौरसिया, डा.विवेक यादव, डा.सुशील साह, डा.सञ्जय जैसवाललगायतको टिमले हरेक दिन उपयुक्त पर्ने समयमा दुई घण्टा ओपिडी सञ्चालन गरी १५ दिनमा विशेषज्ञसहितको सेवा शुरू गर्ने लक्ष्य छ ।
    जेलमा कैदीबन्दीको स्वास्थ्य उपचारको लागि एकजना मेडिकल अफिसर, एकजना एचए र एकजना अनमीको दरबन्दी रहँदै आएकोमा अनमीको दरबन्दी गत वर्ष काटिएको थियो । दरबन्दी भए तापनि चिकित्सक सरुवा भएर आउन नमानेपछि जेलमा कैदीबन्दीको उपचार हुन नसकेको हो । उपचारको लागि नारायणी उपक्षेत्रीय अस्पताल धाउनुपर्ने बFध्यता थियो ।
    २०७१ सालमा नथुमल–हनुमनी देवीका छोरा कन्हैयालाल ,प्रदीप कुमार, अशोक कुमार, विजकुमार, विजयसिंहको १२ लाखको संयुक्त लगानीमा शौचयलयसहितको दुई कोठे उपचार केन्द्र निर्माण भएको थियो । तत्कालीन मुख्य सचिव लीलामणि पौडेलले शिलान्यास गरेको उपचार केन्द्रको तत्कालीन भौतिक पूर्वाधार विकासमन्त्री विमलेन्द्र निधिले उद्घाटन गरेका थिए । तर चिकित्सकको अभावमा सो उपचार केन्द्र आफैं बिरामी बनेको थियो ।
    वीरगंजका सामाजिक अगुवाहरू तथा पत्रकार शङ्कर आचार्य, उद्योगी अशोक वैद्यको सक्रियतामा उपचार केन्द्रमा सेवा शुरू भएको हो । कार्यक्रममा पर्साका डिएसपी मानबहादुर राई, सीमा सुरक्षा कार्यालय पर्साका सप्रनाउ भरतप्रसाद कोइराला, जसपाल सिंह, प्रकाश थारू, दिलीपराज कार्कीलगायतको सहभागिता थियो ।