रौतहट जिल्लाका क्षेत्र नं २ मा नेपाली काङ्ग्रेस र नेकपा एमाले तथा सङ्घीय समाजवादी फोरम नेपालबीच प्रतिस्पर्धा हुने सम्भावना बढदै गएको छ । नेपाली काङ्ग्रेसका उम्मेदवार मोहम्मद आफताब आलम, नेकपा एमालेका उम्मेदवार मोहम्मद मुस्ताक आलम तथा फोरम उम्मेदवार किरण साहबीच प्रतिस्पर्धा हुने चर्चा छ । क्षेत्र नं २ मा २००७ सालदेखि नेपाली काङ्ग्रेसको वर्चस्व कायम रहँदै आएको अवस्थामा संविधानसभा निर्वाचनमा मधेसी जन अधिकार फोरम लोकतान्त्रिकका उम्मेदवार मो मुस्ताक आलम विजयी भएका थिए । मजफा (लो)का अध्यक्ष विजय गच्छदारले नेपाली काङ्ग्रेससँग एकीकरण गरेपछि मो मुस्ताक आलम नेकपा एमालेमा प्रवेश गरी क्षेत्र न २ बाट निर्वाचन लडेका हुन् । नेका उम्मेदवार आलमकै कमी कमजोरीका कारण मुस्ताक आलम संविधानसभामा निर्वाचित भएका थिए । नेकपा माओवादी केन्द्रका किरण साहले टिकट नपाएपछि सङ्घीय समाजवादी फोरम नेपालमा प्रवेश गरी चुनाव लडेका हुन् ।
सो क्षेत्रबाट नेपाली काङ्ग्रेसका मोहमद आफताम आलम, नेकपा एमालेका मो मुस्ताक आलम , सङ्घीय समाजवादी फोरमका उम्मेदवार किरण साह, राष्ट्रिय यर्थाथवादी पार्टीका भोला हजरा, राष्ट्रिय जनमोर्चाका शेख सलाउद्दीन, नेपाल मजदुर किसानका उम्मेदवार मानजोगी कुमारी, नेपाल सङ्घीय मसालवादीका शेख मोहम्मद, नेकपा मालेका शेखयार महम्मद, नेपाली जनता दलका नथुनी मण्डल, एकीकृत राप्रपाका देननाथ महतो, दलित मुस्लिम जनशतिmका दशै बैठालगायत रहेका छन् । गौरमा राजपाको जुलुस
राष्ट्रिय जनता पार्टीको भव्य जुलुस आज सदरमुकाम गौरमा प्रर्दशन भएको छ । सदरम्ुकाम गौरको विपी चोकबाट निस्केको जुलुसले नगर परिक्रमा गरेको थियो । जुलुसमा प्रतिनिधिसभाका उम्मेदवार अनिलकुमार झा, नगर प्रमुख अजयकुमार गुप्ता, वरिष्ठ नेता रामेश्वरराय यादव, प्रदेशसभा ‘क’ का उम्मेदवार बाबूलाल साह, राजपाका केन्द्रीय सदस्य श्यामसुन्दर पटेल, अरुण सिंह, जिल्ला अध्यक्ष शेख जमसैद लगायत हजारौं कार्यकर्ताले जुलुस प्रदर्शन गरेका थिए । यसैगरी सदरमुकाम गौरका विभिन्न वडामा घर दैलो कार्यक्रम गरेका छन् । आज नेकपा एमाले कार्यकर्ताहरू मेराजुल अन्सारी, आरैन अन्सारी, वाजुल अन्सारी, शेख जनरइल, शेख समिरलगायत सयौं कार्यकर्ता नेसपामा प्रवेश गरेका छन् ।
त्यसैगरी वाम गठबन्धन र नेपाली काङ्ग्रेसको घरदैलो कार्यक्रम सम्पन्न भएको छ । वडा कार्यालय वडहर्वा ब्रहमपुरीमा वाम गठबन्धनको घरदैलो कार्यक्रम सम्पन्न भएको छ । प्रतिनिधिसभाका उम्मेदवार सत्यनारायण भगत, प्रदेशसभा ‘क’का उम्मेदवार भिखारीराय यादव ‘ख’ का उपेन्द्र साह लगायत सयौं कार्यकर्ताले घरदैलो गरेका छन् । यसैगरी दिपही तथा छतौनामा वाम गठबन्धनले सांस्कृतिक कार्यक्रम सम्पन्न भएको छ । नेपाली काङ्ग्रेसले धर्मपुरमा घरदैलो कार्यक्रम गरेको छ । प्रतिनिधिसभाका उम्मेदवार कृष्ण यादव, प्रदेशसभाका उम्मेदवार राजेश चौधरीलगायत सयौं कार्यकर्ता घर दैलो कार्यक्रममा सहभागी थिए ।
