तेस्रो चरणको उपयोग गरौं

    पहिलो चरणमा प्रदेश नं. ३, ४ र ६ को चुनाव सम्पन्न गरेको सरकारले राजपाको विरोधका बावजुद दोस्रो चरणको चुनाव पनि सफलतापूर्वक सम्पन्न गरेको छ । अब सरकारको सामु प्रदेश नं. २ को चुनाव असोज २ गते गर्ने जिम्मेवारी छ । स्थानीय तहको निर्वाचन एकै चरणमा सम्पन्न गर्ने सरकारको उद्देश्य थियो । तर राजपाको विरोधको कारण सरकारले उसको पनि सहभागिता गराउन पहिलो चरणमा तीनवटा प्रदेशमा मात्र चुनाव गरायो । पहिलो मधेस आन्दोलन–०६४ देखि मधेसमा शक्तिशाली पार्टी बनेको मधेसी जनाधिकार फोरम नेपाल हालको सङ्घीय समाजवादी फोरम नेपाल पहिलो र दोस्रो चरणको चुनावमा सहभागी भयो । मधेसवादी पार्टीमा शक्तिशाली मानिएको सङ्घीय समाजवादी फोरम नेपाल सहभागी भएपछि राजपा नेपालको शक्ति क्षीण भएको थियो ।
    हुनत सङ्घीय समाजवादी फोरम नेपाललाई पहिलो चरणको निर्वाचनमा लज्जास्पद हार बेहोर्नुप¥यो । माओवादीबाट छुट्टिएको नयाँ शक्ति पार्टीसँगको सहकार्यमा पहिलो चुनाव लडेको फोरम नेपालले सफलता नपाएपछि राजपा नेपालले चुनावमा गएकोमा उसको खिल्ली उडाउन बाँकी राखेन । हुनत फोरम नेपालले बुलेटको जवाफ ब्यालेट हो भनी चुनावमा सहभागिता जनाएपछि उसको राजनीतिक दूरदर्शिताको सबैले प्रशंसा पनि गरे । चुनावमा हारजित सामान्य कुरा हो । राजनीतिक दलको रूपमा आप्mनो पहिचान बनाएको पार्टी चुनावको बर्खिलाप हुनुहुँदैन । अझ लामो समयपछि नेपालमा हुन लागेको स्थानीय तहको निर्वाचनमा सबैको चासो जागृत भएको थियो । यही कारण हो, राजपा नेपालका केही कार्यकर्ता–नेता चुनावको बर्खिलाप जान सकेनन् । सरकारले एकैपटक गर्ने चुनाव चरणबद्ध रूपमा गराउनुको केवल एउटै मात्र उद्देश्य यियो –राजपा नेपालले चुनावमा भाग लेओस् । तर त्यस्तो भएन, पहिलो चरण बहिष्कार गरेको राजपा नेपालले दोस्रो चरण पनि बहिष्कार नै ग¥यो । चुनावमा राजपा नेपाल भाग लिने कुरामा उसैका नेता, कार्यकर्ताहरू पनि ढुक्क थिए । राजपा नेपालमा नेपाली काङ्ग्रेस छाडेर गएका महन्थ ठाकुरजस्ता सुझबुझवाला नेता छन् । राजेन्द्र महतो र अनिल झा बाहेक महेन्द्र यादव, राजकिशोर यादव, शरद सिंह पनि काङ्ग्रेस र एमाले छाडेर मधेस आन्दोलनपछि मधेसवादी पार्टीमा समावेश भएका हुन् । प्रजातन्त्रको लडाइँमा लागिपर्ने दलबाट मधेसवादी दलको नेतृत्व सम्हालेकाले उनीहरू चुनावबाट भाग्नै सक्दैनन् भन्ने आम बुझाइ थियो । सरकारले चुनावमा गर्दै आएको ढिलाइसँगै अब त राजपा नेपाल दोस्रो चरणको चुनावमा पक्कै पनि सहभागी हुन्छ भन्ने आभास पनि नभएको होइन ।
    तर सबै अडकलहरूलाई फेल गर्दै राजपा नेपाल चुनावमा सहभागी नभएर आफै फेल हुन पुग्यो । मधेसको माग नबिर्सेर पनि चुनावमा सहभागी हुन सकिन्थ्यो । अनि चुनावको माध्यमबाट बढीभन्दा बढी सिट जितेर सरकारलाई स्थानीय तहबाट पनि दबाब सृजना गर्नुपर्ने थियो तर यो अवसर पनि गुमाउने काम राजपाले गरेको छ । अब तेस्रो चरणमा यसको उपयोग गर्दा बेस हुन्छ । नत्र मनोबल उच्च भएको सरकारले चुनाव गराइछाडने कुरामा अब जनताको कुनै आशङ्का शेष छैन ।