जिल्ला प्रहरी कार्यालय, पर्साले अपहरणमा संलग्न एकजना प्रहरी जवानसहित तीनजनालाई सार्वजनिक गरेको छ ।
जिप्रका, पर्साले पत्रकार सम्मेलन गरी आफ्नै अपराध शाखामा कार्यरत रहिसकेका हाल सुर्खेतमा दरबन्दी भएर सो स्थानमा कार्यरत प्रहरी जवान अरविन्द सिंहसहित वीरगंजका दीपक सिंह र श्रीभगवान सिंहलाई अपहरण गरी फिरौती लिएको अभियोगमा पक्राउ गरेको जनाएको छ ।
जिप्रका पर्साले पत्रकार सम्मेलनमा बताए अनुसार वीउमनपा–१९ नगवा निवासी राजेशकुमार साहलाई अपहरण गरेर एक महिना अघि अभियुक्तहरूले चार लाख लिएको सूचना हालै प्राप्त भएपछि पक्राउ गरिएको र उनीहरूले कसुर स्वीकार गरेको बताइएको छ । प्रहरी उपरीक्षक राजुबाबू श्रेष्ठले अपहरणमा संलग्न तीनजनासहित थप तीनजनालाई अनुसन्धानको क्रममा पक्राउ गरेको तर उनीहरू कसुरवार नदेखिएपछि सार्वजनिक नगरेको बताए ।
पर्सा प्रहरीले पाएको सूचना अनुसार निजहरूलाई पक्राउ गरी उनीहरूको घर खानतलासी गरेको र अपहरण गरी फिरौती बुझेको रकममध्ये श्रीभगवान सिंहको घरबाट केही रकम बरामद भएको जनाएको छ । प्रहरीले पत्रकार सम्मेलन गरी आइतवार यो कुराको जानकारी गराए पनि प्रतीकलाई प्राप्त सूचना अनुसार पर्सा प्रहरीको अपराध अनुसन्धान शाखामा कार्यरत अरविन्द सिंह र हवल्दार विनय सिंहविरुद्ध अञ्चल प्रहरी कार्यालय वीरगंजमा एक साताअघि वीरगंजका सुन व्यवसायीले उजुरी गरेका थिए । सोही उजुरीका आधारमा उनीहरूविरुद्ध जिल्ला प्रहरी कार्यालय, पर्साले अनुसन्धान शुरु गरेको थियो ।
वीरगंजका सुन व्यवसायीहरूले सुर्खेत सरुवा भएका प्रज अरविन्द सिंहले वीरगंजका सुन व्यवसायीहरूसँग रकम असुल्दै आएको अञ्चल प्रहरीमा गुनासो गरेका थिए । सुर्खेतमा दरबन्दी रहेका सिंहसँग वीरगंजमा सुन व्यवसायीबारे पोख्त सूचना भएको कारण उनले सूचनाको दुरुपयोग गरी व्यवसायीहरूसँग रकम असुल्दै आएका थिए ।
प्रहरीमध्येकै केहीले सिंहको सरुवा सुर्खेतमा भएको बताएपछि सुन व्यवसायीले अञ्चल प्रहरीमा गएर सिंहको हरकतबारेमा उजुरी गरेका थिए । प्रहरी वरिष्ठ उपरीक्षक नारायण सिंह खड्काले जिप्रका पर्साका प्रहरी उपरीक्षक राजुबाबू श्रेष्ठलाई घटनाबारे जानकारी गराएपछि यस सम्बन्धी अनुसन्धान शुरु भएको हो । जिप्रका पर्साको अपराध अनुसन्धान शाखाले सुनको कारोबारीहरूसँग राम्रो साँठगाँठ भएको तथ्यहरू फेला पारेपछि शनिवार अरविन्द सिंह, दीपक सिंह, भगवान सिंहलगायत ६ जनालाई पक्राउ गरेको थियो ।
पक्राउ परेका सबैजनाको अबेर राति घर खानतलासी भएको र खानतलासीबाट नगद रु ४ लाख ७२ हजार, विभिन्न बैंकका चेकबूक ९ थान, भौचर ५ थान, ३ थान (२२ लाख ४० हजारको) तमसुक, दृष्टिबन्धक गरिएको (७ लाखको) जग्गाधनी प्रमाणपूर्जा थान २ बाहेक कुनै सबुत, प्रमाण फेला नपरेपछि प्रहरीले सुन प्रकरणलाई अपहरणमा परिणत गरेको हो । प्रहरीले राजुकुमार साह अपहरणमा ४ लाख फिरौति लिएको दाबी गरे पनि स्रोतका अनुसार यो घटना पनि सुनसँगै सम्बन्धित थियो र साहले निजहरूविरुद्ध अपहरणको मुद्दा दर्ता गराएका थिए । पक्राउ परेका अरविन्द सिंह र उनीसँगै अपराध अनुसन्धानमा वीरगंजमा कार्यरत विनय सिंहलाई सुनका एकथरी कारोबारीले सूचना दिने र उनीहरूकै सूचनाको आधारमा वीरगंजमा सुन समातिने काम हुँदै आएको थियो । एकथरी कारोबारीबाट सूचना पाएर अर्कोथरी कारोबारीलाई सहयोग पुर्याउँदै आएका सिंह सुर्खेत सरुवा भएपछि दुवैथरी कारोबारीसँग महिनावारी असुल गर्न शुरु गरेका थिए । दुवैथरि कारोबारीले सिंहबाट ठगिएको महसुस गरेपछि उनीहरूले सिंहविरुद्ध पछिल्लो समयमा भएको सुनचोरीको घटना पनि प्रहरीलाई बताएका थिए । प्रहरीले सुन प्रकरणमा पक्राउ परेकाहरूबाट कसुर कबुल गराउन सकेको छैन ।
हामीलाई प्राप्त सूचना अनुसार प्रहरीले अपराध अनुसन्धानका हवलदार विनय सिंह, पिपराका सन्तोष पटेल र बडी बिल्डर कारखाना सञ्चालक सोनालाल भन्ने व्यक्तिलाई पक्राउ गरेको थियो ।
उनीहरू अनुसन्धानमा कसुरवार नदेखिएको कारण आइतवारको पत्रकार सम्मेलनमा सार्वजनिक गरिएन । प्रहरी उपरीक्षक राजुबाबू श्रेष्ठले उनीहरूको कसुर प्रमाणित नभएको कारण सार्वजनिक नगरिएको र थप अनुसन्धान भइरहेको बताए ।
