सिम्रौनगढवासीको आन्दोलन

    बारा, सिम्रौनगढ क्षेत्रका बासिन्दा प्रहरीविरुद्ध आन्दोलनमा उत्रेका छन् । बजार बन्द र यातायात अवरुद्ध गर्दे अगाडि बढेको प्रदर्शन क्रमश: आक्रामक बन्दै प्रहरी बिटलाई ध्वस्त बनायो भने इलाका प्रहरी कार्यालय घेराउ गर्दै मुख्य प्रवेशद्वारमैं टायर जलायो । कार्यालय बचाउन प्रहरीले तीन राउन्ड अश्रुग्याँस प्रहार गर्‍यो । सो क्रममा एकजना घाइते भएका छन् । सिम्रौनगढमा इलाका प्रहरी कार्यालय स्थापना सो क्षेत्रका बासिन्दाको आवश्यकता र चाहना तथा माग बमोजिम नै भएको हो । त्यसैगरी सिम्रौनगढ आसपास स्थापना गरिएको बोर्डर रिच पोस्टहरूसमेत नागरिक सहयोगमा स्थापना भएका हुन् । सिम्रौनगढ इलाका प्रहरी कार्यालयमा सरुवा भई आउनेजाने कार्यालय प्रमुख तथा प्रहरी निरीक्षकलाई स्वागत, सम्मान र बिदाइ गर्ने कार्यलाई पनि सो क्षेत्रका बासिन्दाले निरन्तरता दिंदै आएका छन् । त्यति मात्र होइन प्रहरी कार्यालय, बिट, चौकी स्थापना, पुनस्र्थापना, निर्माण तथा मरम्मत सम्भारमा समेत हालसम्म जनसहयोग जुट्दै आएको हो । अत: नागरिक र प्रहरीबीच समन्वयात्मक र सहयोगी भावना रहेको स्थानहरूमध्ये पर्ने सिम्रौनगढका बासिन्दा किन प्रहरीविरुद्ध ओइरिए, बुझ्नुपर्ने कुरा भएको छ ।
    आन्दोलनमा सहभागीहरूले सिम्रौनगढमा छोटी भन्सार माग गरेका छन् । उनीहरूले दैनिक अत्यावश्यक वस्तुहरू सहज र सुलभ तरिकाले उपलब्ध हुने बजार व्यवस्था गरिदिए पनि हुने भनेका छन् । उनीहरूले उक्त माग यसअघि नै औपचारिक–अनौपचारिक धेरैपटक उठाइसकेका छन् । उनीहरूको माग सम्बोधन नभएसम्म आवश्यक सामग्री नुन, तेल, मसला, खाद सीमावर्ती भारतीय बजारबाट ल्याउन पाउनुपर्नेमा जोड दिंदै आएका छन् । सिम्रौनगढका लागि वीरगंज भन्सार निकै टाढा र खर्चिलो पर्छ । सबभन्दा नजिकको भन्सार नै वीरगंज हो । यसअघि कतिपय अवस्थामा अनौपचारिक स्वीकृति अनुसार तस्करीबाहेक व्यक्तिगत उपयोगका सामान ल्याउन छुट दिंदै आएको पनि हो ।
    हाल अवस्था फरक छ । दुईचार किलो नुन, चिनी ल्याउने व्यक्तिलाई समेत अपराधीसरह प्रहरीले व्यवहार गर्ने, दु:ख दिने, अपमान, बेइज्जत गर्ने, जफत गर्ने गरेको आन्दोलित जनताको गुनासो छ । सिम्रौनगढमा प्रहरी इलाका प्रमुखले भने आफू कानुन बमोजिम चलेको तर्क दिइरहेका छन् । कुनै पनि लोकतान्त्रिक मुलुकमा कानुन नागरिकका लागि हुन्छ । नागरिक कानुनका लागि होइन । नागरिक र राष्ट्रहितका लागि बनाइएका कानुन स्थान, समय परिस्थिति अनुसार कतिपय अवस्थामा व्यावहारिक वा जनहित अनुकूल नहुन सक्छ । त्यो अवस्थामा कानुनका संरक्षणकर्ता र पालना गर्नेहरूले भावनाको उपहास नहुने गरी कार्यान्वयन गर्नुपर्छ । आतड्ढकारीलाई सीधै गोली ठोक्ने आदेश पाएको सैनिकले समेत मानव ढालका कारण गोली नचलाई पछाडि हट्नुपर्ने अवस्था आएको छ । दुश्मनलाई देख्दादेख्दै पछि हट्न सेनाको कानुन र धर्मले दिंदैन तर पनि हट्नुपर्छ । त्यहाँ राष्ट्रका नागरिकको जीवनरक्षा पहिलो धर्म बनेर उभिन्छ । निरपराधले दु:ख पाएमा भोलि कानुन र राज्यका लागि झन् प्रत्युत्पादक हुने खतरा हुन्छ । सिम्रौनगढ क्षेत्रमा प्रहरी र जनताबीच द्वन्द्व कानुनको यान्त्रिक पालनाको परिणाम हो । आन्दोलन शुरु भएको तीन दिन बित्न लाग्दा पनि प्रशासन, प्रहरीका जिल्ला प्रमुख र सो क्षेत्रका जनप्रतिनिधिहरू चूँसम्म बोलेका छैनन् । जनताको असन्तुष्टिलाई समयमै समाधान गर्न बुद्धिमानी हुन्छ ।