अतिक्रमित जग्गामा बनाइएको क्राउन प्लाजामा तोडफोड सुरु इनरबाइपासमा पनि चाँडै कारबाई हुन्छ: कार्यकारी अधिकृत

प्रस, वीरगंज, १४ असार/
    सार्वजनिक अतिक्रमणविरुद्ध   वीरगंज उपमहानगरपालिका कार्यालय समेतले चलाएको अभियान अन्तर्गत आज वीरगंज मेनरोडस्थित होटल क्राउन प्लाजा तोडफोड शुरु भएको छ । होटल क्राउन प्लाजाले पुनरावेदनमा दिएको निषेधाज्ञा खारेज भएपछि आज सो होटलले अतिक्रमण गरेको सार्वजनिक जग्गा खाली गराउने काम शुरु भएको हो । वीउमनपाले सार्वजनिक अतिक्रमित जग्गा खाली गराउन यसअघि होटल क्राउन प्लाजालाई बारम्बार ताकेता गर्दै आइरहेकोमा पुनरावेदनबाट अन्तरिम आदेश गराएको थियो । पुनरावेदनले अन्तरिम आदेश जारी गरेपनि निषेधाज्ञा आदेश जारी गर्नु नपर्ने गरी हिजो निर्णय गरेपछि आज वीउमनपाका, जिल्ला प्रहरी कार्यालय, ट्राफिक र सामुदायिक सेवा केन्द्रको संलग्नतामा तोडफोड शुरु भएको हो ।

    क्राउन प्लाजाले अतिक्रमण गरेको सार्वजनिक जग्गा खाली गराउने क्रममा निजी क्षेत्रका कामदार लगाएर भएपनि अतिक्रमित स्थान खाली गराउने वीउमनपाकाको सोच रहेको कार्यकारी अधिकृत दिनेश घिमिरेले बताए । उनले आजदेखि क्राउनप्लाजा होटल तोडफोड शुरु भएको र इनरबाइपासको तोडफोड पनि तत्कालै शुरु गरिने प्रतीकलाई बताए । उनले एक्साभेटर वर्षात्का कारण नाला सफाइमा  व्यस्त रहेकोले सो सकिनासाथै इनरबाइपासको अतिक्रमण हटाउने काम शुरु हुने बताए । अधिकृत घिमिरेले इनरबाइपासको नापजाँच कार्य पूरा भइसकेको र तुरुन्त सो अतिक्रमणविरुद्ध अभियान जारी हुने बताइ ।
    कार्यकारी अधिकृत घिमिरेले रेल्वेको जग्गा अतिक्रमण गरेको महावीर राइस मिलले दुई महिना अगावै १५ दिनको समय लिएर पनि जग्गा खाली गर्ने काम नगरेकोले तत्काल कारबाई शुरु गरिने बताए । उनले अदालतको कारण अभियान स्थगित भएको भएपनि अदालतबाट निर्णय भएकाहरूको हकमा सोहीअनुरूप काम–काबाई शुरु भइरहेको बताएका छन् । उनले अभियानलाई निरन्तरता दिनुका साथै सबैखाले अतिक्रमणविरुद्ध अग्रसर हुने दृढता देखाएका छन ।