सवारी साधनको कडाइका साथ जांज गर्न थालिएपछि एक मोटरसाइकल पक्राउ गरी सोमवार मध्य क्षेत्रीय ट्राफिक प्रहरी कार्यालय पथलैयाले धनीलाई बुझाएको छ।
राजमार्गमा जांचको क्रममा असार २५ गते पक्राउ परेको उक्त मोटरसाइकलको नम्बरप्लेट र कागजपत्र नक्कली पाइएपछि प्रहरीले वास्तविक धनीको खोजी गरी मोटरसाइकल बुझाएको हो।
दुइ महिनाअघि काठमाडांै बौद्धबाट हराएको उक्त मोटसाइकल सवारी चेकजांच गर्ने क्रममा आधाभारबाट नियन्त्रणमा लिइएको मध्य क्षेत्रीय ट्राफिक प्रहरी कार्यालयका प्रहरी नायब उपरीक्षक सुरेन्द्रबहादुर सिंहले बताए।
राजमार्गमा चेकजांच गर्ने क्रममा शङका लागी नियन्त्रणमा लिएर अनुसन्धान गरेपछि सवारीको वास्तविक धनी पत्ता लागेको सिंहले बताए।
ट्राफिक प्रहरी कार्यालयका अनुसार रामेछाप घर भई हाल काठमाडौं बस्दै आएका यज्ञप्रसाद चौलागाईंको नाममा रहेको बा४० प-४६११ नम्बरको उक्त पल्सर मोटसाइकलको नम्बर प्लेट र कागजपत्र दुवै नक्कली पाइएको छ। चोरी गर्ने गिरोहले उक्त मोटसाइकलको नम्बर परिवर्तन गरी ना.१३ प-१२५२ र परवानीपुर-३, र्सलाही घर भएको उल्लेख गर्दै आकाश न्यौपानेको नाममा नक्कली कागजपत्र बनाएका थिए।
दुरुस्तै देखिने उक्त नक्कली कागजपत्रमा चोरी गर्ने गिरोहले सो मोटरसाइकल आफनो नाममा नामसारी गरेको समेत देखाएको छ। सक्कली भन्दा केही नरम हुने उक्त नक्कली कागजपत्रमा प्रयोग भएको यातायात व्यवस्था कार्यालयको छाप समेत दुरुस्त देखिएको छ।
कागजपत्र र छाप दुरुस्त रहे पनि नक्कली भएको थाहा पाउन भने कठिन नहुने उपरीक्षक सिंहको भनाइ छ। केही दिन यता ट्राफिक प्रहरीले राजमार्गमा चल्ने साना सवारीसाधन चेकजांच गर्ने क्रम तीव्र पारेको छ।
मध्यक्षेत्रीय ट्राफिक प्रहरी कार्यालयले गत वर्ष चोरीका १८ वटा जीप र ८४ वटा मोटरसाइकल नियन्त्रणमा लिएको थियो। पक्राउ गरिएको सवारी साधनमध्ये एउटा जिप र १२ मोटसाइकल भने सम्बन्धित सवारीधनीलाई बुझाइसकेको नायब निरीक्षक थपलियाले जानकारी गराएका छन्।
पक्राउ गरिएको अन्य सवारीसाधनमध्ये तीनवटा जिप र २१ वटा मोटसाइकल अनुसन्धानको लागि अन्यत्र पठाइएको, १४ वटा जिप र २४ मोटरसाइकल भन्सार तथा राजस्व कार्यालयमा बुझाइएको थियो। नियन्त्रणमा परेकामध्ये २७ मोटसाइकल भने अनुसन्धानको क्रममा हाल सोही कार्यालयमा राखिएको जानकारी गराइएको छ।
