प्रस, वीरगंज, १५ साउन/
नारायणी अस्थायी कोभिड गण्डक अस्पतालमा क्षमताभन्दा बढी सङ्क्रमित राखिएका छन् भने सोको दुई गुणा बढी सङ्क्रमित अहिले भगवान् भरोसे अवस्थामा छन्।
पछिल्लो चरणमा वीरगंजमा कोरोना सङ्क्रमितको सङ्ख्या दिनानुदिन बढ्दै गएपछि अहिले गण्डक अस्पतालमा क्षमताभन्दा बढी सङ्क्रमित रहेको डा उदयनारायण सिंहले बताए। साउन १ गतेदेखि वीरगंजमा कोरोना सङ्क्रमित सङ्ख्या बढेको हो। असार ३१ गतेसम्म गण्डक अस्पतालमा एकजना मात्र सङ्क्रमित थिए। त्यसपछि बढ्दै गएर अहिले गण्डक अस्पतालमा ६२ जना छन् भने अस्पतालबाहिर सयभन्दा बढी सङ्क्रमित छन्।
गण्डक अस्पतालको क्षमता ५० शøयाको हो। त्यहाँ १० शøयाको आइसियू छ। जसमा ५ जना छन्। ५० शøयाको अस्पतालमा अहिले कुल बिरामी ६२ जना रहेको र उनीहरूलाई जसोतसो व्यवस्थापन गरिएको डा सिंहले बताए। उनले मङ्गलवार र बुधवार भेटिएका सङ्क्रमितहरूलाई व्यवस्थापन गर्न नसकिएको बताएका छन्। साउन ८ गतेपछि सङ्क्रमित हुनेहरू आइसोलेशनको अभावमा सम्बन्धित क्वारेन्टाइन, कारागार, ब्यारेक, प्रहरी कार्यालय, घरमा बस्दै आएका छन्। उनीहरूलाई सचेत पनि गराइएको छैन। घर र सम्बन्धित ठाउँमा आइसोलेट हुनेहरूलाई सचेत गराउनुपर्नेमा त्यस्तो केही नगरिएको डा सिंहले बताए। उनले बाहिर रहेका सङ्क्रमितहरूलाई सचेत नगराएको खण्डमा जोखिमको बढ्दै जाने बताए। खासगरी घरपरिवारमा बस्नेहरूलाई सचेत नगराउने हो भने कोरोनाको कहर झनै बढ्ने खतरातर्फ उनले औंल्याएका छन्। उनले अहिले बाहिर रहेका सङ्क्रमितहरू भगवान् भरोसे अवस्थामा रहेका प्रतिक्रिया दिएका छन्।
चैत २९ गतेदेखि वीरगंजमा सङ्क्रमित देखिएका हुन्। पहिलो चरणमा देखिएका सङ्क्रमितहरूलाई नारायणी अस्पतालको आइसोलेशनमा राखिएको र दुईपटक नेगेटिभ रिपोर्ट आएपछि एक साता घरमा आइसोलेट भएर बस्ने लिखित शर्तनामा गराएर मात्र छाड्ने गरिएको थियो। तर अहिले आइसोलेशनको पनि व्यवस्था गरिएको छैन र सचेत पनि गराइएको छैन। अहिले कोरोना सङ्क्रमण व्यापकरूपमा फैलिएको र सङ्क्रमितहरूमा लक्षण पनि देखिएको अवस्थामा सुरक्षाका कुनै पनि मापदण्ड अपनाउने कार्यतर्फ स्वास्थ्यकर्मी, सुरक्षाकर्मीहरू संवेदनशील देखिएका छैनन्। यसो नहुनुको कारण भने एकापसमा मतान्तर देखिएकोले हो।
तीन तहको सरकार भएको बेलामा स्थानीय सरकार (वीरगंज महानगरपालिका)ले सङ्घ र प्रदेश सरकारलाई कोरोना सङ्क्रमणमा लापर्बाह भएको आरोप लगाउँदै आएको छ। वीरगंज महानगरका प्रमुख विजयकुमार सरावगीले सङ्घ र प्रदेश सरकार कोरोना सन्दर्भमा गम्भीर नभएको आरोप लगाउँछन्। उनले महानगरपालिकाले आफ्नो खर्चमा आइसोलेशन शøया तयार गरेको, क्वारेन्टाइन बनाएको, प्रिआइसोलेशनको व्यवस्था गरेको, सङ्क्रमित र चिकित्सकहरूको लागि गाँस, बासको व्यवस्था गरेको, अस्पताललाई पिसिआर र आवश्यक किट, प्रयोगशालाको लागि सामग्री उपलब्ध गराएको बताए। उनले यो अवधिमा सङ्घ र प्रदेश सरकारले आइसोलेशन वार्डको व्यवस्थापन नगरेको र कोरोना रोकथाम नियन्त्रणका लागि गैरजिम्मेवार भएको आरोप लगाउँछन्।
पहिलो चरणमा लकडाउन भएसँगै आइसोलेशन तयार गर्नुपर्ने थियो तर महानगरपालिकाले निजी अस्पताल तीन महीना भाडामा लिएर चलाउँदा पनि आइसोलेशन बनाइएन। आइसोलेशन बनाउनको लागि र सङ्क्रमणबाट जोगिनको लागि सङ्घ र प्रदेश सरकारले महानगरलाई गर्ने भनेको सहयोग गरेनन्। यो अवस्थामा महानगरले धान्नेसम्मको काम मात्र गरेको उनले बताए।
कोरोनाको सम्बन्धमा वीरगंजमा सङ्क्रमित बढ्दै गएपछि मुख्यमन्त्री लालबाबू राउत गद्दी र सामाजिक विकासमन्त्री नवलकिशोर साहले वीरगंज उद्योग वाणिज्य सङ्घको सभाहलमा आएर सुरक्षाकर्मी, स्वास्थ्यकर्मी, नागरिक समाज, व्यापारीसँग छलफल गरेका थिए। नगरप्रमुख काठमाडौं गएका बेलामा मुख्यमन्त्रीले छलफल कार्यक्रम राख्नुले दुवैबीच मतान्तर रहेको कुरालाई पनि पुष्टि गर्छ। यही कारण हो स्थानीय र प्रदेशबीच सहकार्य हुन सकेको छैन। प्रदेश सरकारले कोरोना सङ्क्रमितहरूको लागि नारायणी अस्पताल, जिल्ला प्रशासन कार्यालयलाई सहयोग उपलब्ध गराएको र त्यो सहयोग सार्थक नभएको निष्कर्ष निकालेको थियो। अहिलेको अवस्थामा सङ्क्रमण फैलिन नदिनका लागि आइसोलेशन वार्ड तयारी गर्नु नितान्त जरुरी देखिन्छ। सङ्क्रमितमा लक्षण देखिएको र रोगले ग्रस्त भएका सङ्क्रमितहरूलाई मात्र आइसोलेशनमा राख्ने र लक्षण नदेखिएका सङ्क्रमितहरूलाई प्रिआइसोलेशन, क्वारेन्टाइन र होम क्वारेन्टाइनमा सशर्त राख्ने व्यवस्था गरिनुपर्ने हो तर यसतर्फ कसैले पनि पहल गरेको छैन। जसले गर्दा आइसोलेशनमा भएकाहरू आइसोलेशनमा छन्, क्वारेन्टाइनमा बसेकाहरू त्यही छन् र घरमा बसेकाहरू विनाकुनै स्वास्थ्य निर्देशन आइसोलेट भएर बस्नुपर्ने अवस्था छ।