मुख्यमन्त्री लालबाबू राउतले बाढी बाट प्रदेश नं. २ मा भएको क्षतिबारे प्रधानमन्त्री केपीशर्मा ओलीलाई जानकारी गराएका छन्।
मुख्यमन्त्री राउतको नेतृत्वमा सङ्घीय राजधानी काठमाडौं पुगेको सर्वदलीय टोलीले आइतवार प्रधानमन्त्री ओलीलाई भेटेर प्रदेश २ मा बाढीले पु¥याएको क्षतिबारे अवगत गराएका हुन् । प्रधानमन्त्री निवास बालुवाटारमा भएको भेटघाटमा मुख्यमन्त्री राउतले बाढीबाट भएको जनधनको क्षतिपूर्ति प्रदेश सरकारको बुताभन्दा बाहिर रहेको बताउँदै विस्थापितहरूको पुनर्वास र पुनर्निमाण र नदी नियन्त्रण तथा सडक मरम्मतका लागि लागि सहयोग गर्न सङ्घीय सरकारसँग अनुरोध गरेका थिए ।
सो अवसरमा प्रधानमन्त्री ओलीले बाढी प्रभावित क्षेत्रको छिट्टै भ्रमण गर्ने बताउँदै विपत्तिमा सहयोग गर्न सङ्घीय सरकार तयार रहेको र आवश्यक सहयोग गर्ने बताए।
नेकपाका अध्यक्ष तथा पूर्व प्रधानमन्त्री पुष्पकमल दहालको समेत उपस्थिति रहेको उक्त भेटमा प्रदेश २ सर्वदलीय टोलीका भौतिक पूर्वाधार विकासमन्त्री जितेन्द्र सोनल, आन्तरिक मामिला तथा कानूनमन्त्री ज्ञानेन्द्रकुमार यादव, नेकपा संसदीय दलका नेता सत्यनारायण मण्डल, नेपाली कांग्रेस संसदीय दलका नेता रामसरोज यादवलगायत सदस्य थिए।
भीषण बाढीका कारण प्रदेश नं. २ मा क्षतिग्रस्त भएका मुख्य सडकहरूको मरम्मत कार्य तत्काल शुरू हुने भएको छ।
बाढीबाट प्रदेशमा भएको व्यापक क्षतिबारे जानकारी गराउनुका साथै पुनर्निर्माणका लागि सहयोग जुटाउन सङ्घीय राजधानी काठमाडौ पुगेका मुख्यमन्त्री लालबाबू राउतसहितको टोलीसँग सङ्घीय सरकारको भौतिक पूर्वाधार तथा यातायात मन्त्रालयले क्षतिग्रस्त सडकहरूको तत्काल मरम्मत शुरू गर्ने प्रतिबद्धता जनाएको हो।
आजै बिहान प्रधानमन्त्रीसँग छलफल गरेको सर्वदलीय टोलीले दिउँसो भौतिक पूर्वाधार तथा यातायातमन्त्री रघुवीर महासेठको उपस्थितिमा मन्त्रालयका सचिव, सडक विभागका महानिर्देशक, हुलाकी राजमार्ग परियोजनाका प्रमुख सहितसँग सामूहिक छलफल गरेको थियो । छलफलमा मुख्यमन्त्री लालबाबू राउतले बाढीका कारण प्रदेशका सबै सडकप्रायः अवरुद्ध भएकोले राहत वितरणमा समेत समस्या भइरहेको गुनासो गरेपछि सडकको मरम्मत कार्य तत्काल शुरू हुने भएको हो ।
छलफलमा सङ्घीय भौतिक पूर्वाधार तथा यातायातमन्त्री रघुवीर महासेठले सडक मरम्मतका लागि सबै शक्ति परिचालन गर्न निर्देशन दिएका छन्।
प्रदेश नं. २ को सडक मरम्मतका लागि सङ्घीय सरकार मातहतका सडक डिभिजन कार्यालय, प्रदेश सरकारको मेकानिज्म र आवश्यक परे अन्य प्रदेश बाटसमेत प्राविधिक सहायता जुटाउने सहमति भएको मुख्यमन्त्री राउतले जनाएका छन्।
छलफलमा प्रदेशको तर्फबाट भौतिक पूर्वाधार विकासमन्त्री जितेन्द्र सोनल, नेकपा संसदीय दलका नेता सत्यनारायण मण्डलसहितको सहभागिता थियो।
पुनर्वास तथा पुनःनिर्माणका लागि सहयोग जुटाउने उद्देश्यले काठमाडौं पुगेको सर्वदलीय टोली सम्बन्धित पक्षसँग भोलि पनि छलफल गर्ने बताइएको छ।
