दिवाकर भण्डारी/राधेश्याम पटेल, १६ चैत/
प्रदेश नं २ मा स्थगित भएको एसइर्ई परीक्षाको विषयलाई लिएर बाराको जीतपुर शनिवार दिनभर तनावग्रस्त बन्न पुगेको छ ।
परीक्षा स्थगित भएको विरोधमा आक्रोश पोख्न सडकमा उत्रिएका विद्यार्थी र प्रहरीबीचको झडपले जीतपुरसिमरा उपमहानगरपालिकाको जीतपुर बजार करीब ६ घण्टा तनावग्रस्त बनेको हो ।
प्रश्नपत्र बाहिरिनु र परीक्षा स्थगित हुनुमा सरकार दोषी रहेको भन्दै विद्यार्थीले जीतपुरस्थित सडकमा बिहानैदेखि यातायात अवरुद्ध पार्दै प्रदर्शन थालेका थिए । सडकमा उत्रिएका विद्यार्थीलाई हटाउन प्रहरीले बल प्रयोग गरेपछि स्थिति तनावपूर्ण बनेको थियो ।
प्रहरीले यातायात खुलाउने क्रममा बल प्रयोग गरेको भन्दै आक्रोशित विद्यार्थीले प्रहरीमाथि ढुङ्गा प्रहार गरेपछि दोहोरो झडप भएको थियो । विद्यार्थी र प्रहरीबीचको झडप नियन्त्रणमा आउन करीब ६ लागेको थियो । झडपका क्रममा विद्यार्थी र प्रहरी दुवैतर्पm दर्जनौंभन्दा बढी घाइते भएका छन् ।
जीतपुर उद्योग वाणिज्य सङ्घका अध्यक्ष सञ्जय साहका अनुसार विद्यार्थीहरूले राजमार्ग अवरुद्ध गरिरहेको बेला राजमार्ग खुलाउन आएका सुरक्षाकर्मीहरूले प्रदर्शनकारी विद्यार्थीहरूमाथि लाठी चार्ज गरेपछि अवस्था अनियन्त्रित बनेको हो ।
घाइतेमध्ये विद्यार्थी रमिता चौधरी, स्थानीय हरिशङ्कर गुप्तालगायतको स्थानीय स्वास्थ्य क्लिनिकमा उपचार हुन नसकेपछि थप उपचारका लागि वीरगंज लगिएको छ । झडपमा प्रहरीतर्पm आठजना घाइते भएका छन् । घाइतेमध्ये प्रहरी जवान ललनदेव यादव, एके सिंह, निरु श्रेष्ठलगायतको स्थानीय अस्पतालमा उपचार भइरहेको छ ।
झडप नियन्त्रणभन्दा बाहिर गएपछि प्रहरीले दर्जनौंको सङ्ख्यामा हवाई फायर र अश्रुग्यास प्रहार गरेको थियो । प्रदर्शनमा उत्रिएका विद्यार्थीलाई प्रहार गरिएको अश्रुग्यास स्थानीयको घरमा पुग्दा स्थिति झन् तनावपूर्ण बन्न पुगेको थियो । प्रहरीले अनावश्यक बल प्रयोग गरेको भन्दै विद्यार्थीको आन्दोलनमा स्थानीयसमेत सहभागी भएका थिए ।
प्रदर्शनमा उत्रिएका विद्यार्थीले जीतपुरस्थित इलाका प्रहरी कार्यालयमा ढुङ्गा प्रहार गर्दा कार्यालय भवनमा क्षति पुगेको छ । भवनको ढोका र भ्mयालका सम्पूर्ण सीसा फुटेका छन् । विद्यार्थीले प्रहार गरेको ढुङ्गा कार्यालय भवनभित्र यत्रतत्र छरिएको छ । कार्यालयभित्र रहेका प्रहरीलाई निशाना बनाउँदै विद्यार्थीले कार्यालय भवनमा ढुङ्गा प्रहार गरेका थिए । विद्यार्थीले प्रहार गरेको ढुङ्गाले कार्यालय परिसरमा रोकिराखेको जीप र मोटरसाइकलमा समेत क्षति पुगेको छ ।
आक्रोशित विद्यार्थीले सशस्त्र प्रहरीको ना.१ झ ७१२ नम्बरको जीपमा तोडफोड र आगजनी गरेका थिए । आगजनीबाट गाडीको पछिल्लो भाग पूर्णरूपमा जलेको छ भने अघिल्लो भागको सीसा फुटेको छ । विद्यार्थीले इलाका प्रहरी कार्यालयको बा.२ प ७५२४ नम्बरको मोटरसाइकलमा आगजनी गरेका थिए । आगजनीबाट मोटरसाइकल पूर्णरूपमा जलेको छ । विद्यार्थीले दर्जनौंको सङ्ख्यामा सार्वजनिक सवारीसाधनको सीसासमेत फुटाएका थिए ।
आक्रोशित विद्यार्थीले इलाका प्रहरी कार्यालयमा रोकिएका अन्य सवारीसाधनमा समेत आगजनीको प्रयाससमेत गरेपछि स्थिति नियन्त्रणमा ल्याउन निजगढ र जिल्ला प्रहरी कार्यालयबाट प्रहरी नायब उपरीक्षक हेम शाहीको नेतृत्वमा प्रहरी टोली जीतपुर आएको थियो । स्थिति नियन्त्रणमा लिन सयौंको सङ्ख्यामा सशस्त्र प्रहरीसमेत खटिएका थिए । इलाका प्रहरी कार्यालय जीतपुरमा रोकिराखेको बिआर ०५ पिए ७२११ र बिआर ०५ एस ०१६९ नम्बरका दुईवटा भारतीय गाडीलाई पनि प्रदर्शनकारी विद्यार्थीहरूले तोडफोड गरेका थिए ।
ठूलो सङ्ख्यामा आएको प्रहरीले राजमार्गबाट प्रदर्शनमा उत्रिएकालाई तितरबितर पार्दै नियन्त्रणमा लिन थालेपछि स्थिति सामान्य बनेको थियो । प्रहरीले आठजनालाई नियन्त्रणमा लिएको छ । नियन्त्रणमा लिइएकालाई जिल्ला प्रहरी कार्यालयमा राखिएको प्रहरी उपरीक्षक सानुराम भट्टराईले जानकारी दिए । स्थिति सामान्य बनेपछि दिउँसो ३ बजेदेखि यातायात सञ्चालनमा आएको थियो ।
नियन्त्रणमा परेकालाई तत्काल रिहा गर्न स्थानीयले माग गरेका छन् । पक्राउ परेकाको रिहाईको विषयमा छलफल गर्ने तयारी भइरहेको प्रहरी उपरीक्षक भट्टराईले जानकारी दिए । पक्राउ परेकालाई रिहाई गर्न र थप झडपको स्थिति आउन नदिन प्रमुख जिल्ला अधिकारी राजेश पौडेलसँग समन्वय भइरहेको जीतपुरसिमरा उपमहानगरपालिकाका प्रमुख डा. कृष्ण पौडेलले जानकारी दिए ।
यसैगरी, एसइई परीक्षा स्थगित भएको विरोधमा सिमरामा पनि विद्यार्थीले प्रदर्शन गरेका छन् । प्रदर्शनका क्रममा सिमरामा विद्यार्थीले राजमार्ग अवरुद्ध पार्दै केही सवारीसाधनमा तोडफोड गरेका थिए ।
प्रस, कलैया/
एसइई परीक्षा स्थगनको पूर्वजानकारी नहुँदा पूर्वतालिका अनुसार शनिवार बिहान पनि कलैयाका परीक्षार्थीहरू एसइई परीक्षा केन्द्रमा पुगेका थिए । परीक्षा दिन गएका विद्यार्थीहरू परीक्षा नहुने भएपछि आक्रोशित बनेका थिए । विद्यार्थीहरू एकीतृत हुँदै नाराबाजीका साथ नगर परिक्रमा गरी विरोध प्रदर्शन गरेका थिए ।
सयौंको सङ्ख्यामा रहेका विद्यार्थीहरूलाई विभिन्न विद्यार्थी सङ्गठनका अगुवाहरूले अगुवाई गरेको उक्त प्रदर्शन अनियन्त्रित बन्दै गएपछि प्रहरी र प्रदर्शनकारीबीच झडप भएको थियो । विद्यार्थी र प्रहरीबीच झडप हुँदा केही विद्यार्थीका साथै प्रहरी सहायक निरीक्षक अशोक कुर्मी र प्रहरी हवलदार विजय यादव घाइते भएका छन् ।
प्रस, निजगढ/
एसइई परीक्षा स्थगित भएको विरोधमा शनिवार निजगढमा पनि विद्यार्थीहरूले नाराजुलुस गरी प्रदर्शन गरेका छन् ।
विद्यार्थीहरूले निजगढको शहीद चोक र राजमार्गमा चर्को नाराबाजी गर्दै प्रदर्शन गरेका थिए ।
विद्यार्थीहरूले घटनाका दोषीलाई कारबाई गर्न र अविलम्ब परीक्षा सञ्चालन गर्न माग गरेका थिए ।
८ घण्टा राजमार्ग ठप्प
जीतपुर झडपको कारण वीरगंज–पथलैया सडकमार्ग करीब ८ घण्टा अवरुद्ध भएको थियो । अवस्था तनावपूर्ण रहेकोले बजारभन्दा बाहिरतर्पm नै सुरक्षाकर्मीले सवारीसाधन रोकेका थिए । साइकल र मोटरसाइकलहरू भने निर्बाध चलेका थिए ।
बिहान करीब ७ बजेदेखि अवरुद्ध सडकखण्ड दिउँसो ३ बजेपछि सुचारु भएको थियो । मध्याह्न १२ बजेपछि जीतपुर बजार सामान्य बन्दै गएको जीतपुरसिमरा उपमहानगरपालिकाका प्रमुख डा. कृष्ण पौडेलले बताए । उनले प्रहरी प्रशासनसँग आन्दोलनमा बल प्रयोग नगरी साम्य बनाउनेतर्पm पहल गर्न आग्रह गरेको बताए । उनले एसइई परीक्षाको स्थगनले विद्यार्थीको मनोविज्ञानमा परेको असरको कारण उनीहरू आन्दोलित भएको भन्दै यसलाई सबै तहबाट शान्त बनाउन अपिल गर्नुपर्ने बताए ।