चिकित्सक पति डा. सच्चिदानन्द यादवको कुटपिट तथा यातनाबाट पत्नी सुनीतादेवी यादवको शुक्रवार उपचारको क्रममा मृत्यु भएपछि मृतक सुनीतालाई न्याय दिनुपर्ने र हत्यामा संलग्न दोषीहरूमाथि कडा कारबाई हुनुपर्ने माग गर्दै अधिकारकर्मीहरूले वीरगंजमा प्रदर्शन गरेका छन् ।
सामाजिक अभियन्ता, नागरिक अगुवा र महिला अधिकारकर्मीहरूले शनिवार संयुक्त जुलुस प्रदर्शन गर्दै ‘सुनीतालाई न्याय दिलाऔं’ं नारा लगाएका थिए । वीरगंजको घण्टाघरबाट बिहान ८ बजे शुरू भएको जुलुस बजार परिक्रमा गरी पुनः घण्टाघरमा आएर कोणसभामा परिणत भएको थियो ।
सभामा ठाकुर राम बहुमुखी क्याम्पसकी प्राध्यापक डा. सुषमा द्विवेदी तिवारीले मधेसी समाजको विकृतिको कारण यस्तो घटना भएको भन्दै दुःख व्यक्त गरिन् ।
घटनाको जड बालविवाह र दाइजो रहेको उनको विश्लेषण थियो । सुनीतालाई उनको पतिलगायत ससुराली पक्षले चरम यातना दिएर जबरजस्ती पागल घोषणा गर्ने दुष्प्रयास गर्दा समाज तथा कानूनले चासो नदेखाएपछि अपराधीहरूले ज्यान लिने दुष्साहस गरेको डा. तिवारीको भनाई थियो ।
अर्की प्राध्यापक मोनिका सिंहले सुनीतादेवी यादवको घटनाप्रति आक्रोश व्यक्त गरिन् । उनले मृतक सुनीताका ससुरा नागेन्द्र यादव, देवरलगायतका अभियुक्तहरूलाई यथाशीघ्र पक्राउ गरी कानूनी कठघरामा उभ्याउन माग गरिन् ।
सो अवसरमा सामाजिक अभियन्ता प्रकाश थारूले सुनीताका हत्यारालाई सर्वस्वसहितको जन्मकैदको माग गर्दै यस विषयमा प्रहरी प्रशासन गम्भीर बन्न आग्रह गरे । थारूले अपराधीहरूलाई राजनीतिक संरक्षण गर्ने कुचेष्टा कतैबाट पनि नहोस् भन्दै घटनाका दोषी जति सबैलाई सजाय दिलाउन प्रहरीको अनुसन्धान दरिलो हुनुपर्ने जोड दिए ।
महिला अधिकारर्मीहरूले वीरगंज–२० हरपतगंजका बासिन्दा तथा नारायणी अस्पतालका चिकित्सक डा. सच्चिदानन्द यादवलगायत परिवारका सदस्यहरूको सहभागितामा सुनीताको ज्यान लिने कार्य भएको चर्चा गरेका थिए ।
बारा परवानीपुर गाउँपालिका वडा नं ५ बहुअरी माइत रहेको सुनीताको २०५९ सालमा सच्चिदानन्दसँग विवाह भएको थियो । दाइजोबापत सुनीताको माइतीले दिएको २० लाख रुपैयाँबाट सच्चिदानन्दले रूसमा गएर चिकित्सा शिक्षा अध्ययन गरेका थिए । २०६२ सालमैं जिल्ला प्रहरी कार्यालयमा कुटपिटको मुद्दा पर्दा त्यस बखत मिलापत्र भएको थियो । जसमा मृतकको ससुराली पक्षले अबदेखि कुटपिट नगर्ने प्रतिबद्धतासमेत गरेको थियो ।
डा. यादव आइसियुबाट थुनामा
कुटपिटबाट सुनीताको उपचारको क्रममा मृत्यु भएपछि हत्या अभियोग लागेका पति डा. सच्चिदानन्द यादवलाई प्रहरीले थुनामा राखेको छ । यसअघि ज्यान मार्ने उद्योगमा मुद्दा दर्ता भएपछि डा. सच्चिदानन्दले आपूm अस्वस्थ्य रहेको बताई प्रहरी निगरानीमा अस्पतालको आइसियुमा भर्ना भएका थिए ।
उपचारको लागि आइसियुमा भर्ना भएका डा. यादवलाई पुनः जिल्ला प्रहरी कार्यालयको थुनामा ल्याएको पर्साका प्रहरी उपरीक्षक रेवती ढकालले जानकारी गराए । उनले गएराति ११ बजे यादवलाई थुनामा ल्याएको पुष्टि गरे । सुनीता देवीको हत्यामा पति सच्चिदानन्द, ससुरा नागेन्द्र यादव, सासू आशादेवी र देवर अचितानन्दमाथि पर्सा प्रहरीले ज्यान मुद्दा दर्ता गरी अनुसन्धान अघि बढाएको छ । तीनजनामध्ये पति मात्र पक्राउ परेका छन् भने बाँकी फरार छन् । उनीहरूलाई समात्ने प्रयास भइरहेको जिप्रका पर्साले जनाएको छ ।
