विवाद समाधान गर्न निजगढमा खोला अनुगमन समिति

प्रस, निजगढ, १२ मङ्सिर/
    निजगढस्थित बकैया खोलाको उत्खनन विवादबारे सर्वपक्षीय छलफल बुधवार निजगढमा सम्पन्न भयो  ।
    छलफलका सहभागीहरूले विवाद समाधानका लागि निजगढ नगरप्रमुख सुरेशकुमार खनालसमेत रहने गरी खोला अनुगमन समिति गठन गर्नुपर्ने सुझाव दिएका थिए । सर्वपक्षीय छलफलको सुझाव अनुसार २९ सदस्यीय खोला अनुगमन समिति गठन गर्ने निर्णय नगरपालिकाले बुधवारै गरेको निजगढ नगरप्रमुख खनालले जानकारी गराए ।
    निजगढ नगरपालिकाले ठेक्का आह्वान गरेपछि ठेक्का सकार गरेको ओम सप्लायर्स कलैयाले खोलामा स्काभेटर प्रयोग गरी नदीजन्य वस्तु ग्राभेल, बालुवा, ढुङ्गा निकाल्न थालेपछि स्थानीयले उक्त कार्यको विरोध गर्दै पटकपटक अवरोध गर्दै आइरहेका थिए ।
    निजगढ नगरपालिकाले जिल्ला समन्वय समिति कलैया बाराको प्रारम्भिक वातावरणीय परीक्षण प्रतिवेदन अनुसार पुलको उत्तरतर्पm प्लट नं ३ को खोलाबगर बीचमा ठेकेदारले स्काभेटरद्वारा उत्खनन गर्न थालेका थिए । स्थानीयको विरोधपछि उत्खनन कार्य स्थगित छ ।
    आजको छलफलमा सहभागी अधिकांशले उत्खनन गर्ने नाममा ठेकेदारलाई मनोमानी ढङ्गले कार्य गर्न दिन नहुने तर बस्ती, वन, ड्याम, पुललगायतका संरचनालाई क्षति तथा असर नपुग्ने गरी ठेकेदारलाई उत्खनन गर्न रोक्न पनि नहुने विचार व्यक्त गरेका थिए ।
     जिसस बाराद्वारा तयार पारिएको प्रारम्भिक वातावरणीय परीक्षण प्रतिवेदनलाई अध्ययन गरी खोला, बस्ती, वनलाई कुनै असर नपर्ने गरी नदीजन्य वस्तु उत्खनन गर्न दिइएको निजगढ नगरप्रमुख खनालको भनाइ छ ।
    उक्त रिर्पोट अनुसार बकैया खोलाको कुल ४ वटा प्लट तयार गरी उत्खनन गर्न सकिने स्थान निर्धारण गरेको छ ।  वार्षिक सङ्कलन तथा उत्खनन क्षमता २ लाख ३७ हजार ८५० घनमिटर उल्लेख छ ।
    आजको छलफलमा युवराज लामा, शम्भुबहादुर बुढाथोकी, रामजी बजगाईं, सुदर्शन कोइराला, अर्जुन लम्साल, पदमबहादुर भण्डारी, अम्बिका चौलागाईं, बेनीबहादुर मोक्तान, सुरथ पुरी, महेशी कुमार, कर्णबहादुर लामा, भोला गौतम, रविराज दङ्गाल, दुर्गा कोइराला, विनोद बुढाथोकी, रवि बर्तौला, जीतलाल श्रेष्ठलगायतले आआप्mनो रायसुझाव राखेका थिए ।
    नगरप्रमुख खनालको सभापतित्वमा भएको कार्यक्रमको सञ्चालन प्रशासकीय अधिकृत भरतचन्द्र अधिकारीले गरेका थिए । कार्यक्रम निजगढ उद्योग वाणिज्य सङ्घको सभाकक्षमा भएको थियो ।