वीरगंज वितरण केन्द्रमा नयाँ प्रमुखको आगमनसँगै औद्योगिक क्षेत्रमा हुने विद्युत् चुहावटमा सुधार आउनुका साथै छुट भएको विद्युत् महसुल सङ्कलनमा पनि सकारात्मक प्रभाव परेको छ ।
६ महिनाअघिदेखि वितरण केन्द्र वीरगंजमा प्रमुखको रूपमा मुनिन्द्र ठाकुर आएपछि यस्तो सुधार हुँदै गएको हो । हालसम्म उनले करिब रु ९ करोडको हाराहारीमा महसुल उठाउन सफल भएका छन् ।
बिजुली चोरलाई समातेर ९३ वटा मुद्दामार्पmत् ३३ लाख, लाइन पुनः जडानबापत ४ करोड ६७ लाख, ८१ जनालाई कालोसूचीमा राखेकोबाट ३९ लाख ४६ हजार र टिओडी–टोड (टाइम अफ डे) मिटरबाट औद्योगिकरूपमा छुट भएको बिलिङबाट २५ उद्योगबाट साढे ३ करोड गरी ८ करोड ८९ लाख रुपैयाँ सङ्कलन गरिएको उनले जानकारी गराए । साथै, औद्योगिक क्षेत्रमा टोड मिटरमा चुहावट भएको अनुसन्धानबाट पत्ता लागेको र महसुल निर्धारणको लागि १५ वटा उद्योगको फाइल माथिल्लो निकायमा पठाइसकिएको पनि उनले जानकारी गराए । १५ वटा उद्योगबाट करिब रु २ करोडको विद्युत् महसुल उठ्ने अनुमान गरिएको छ ।
यसैबीच, वीरगंज–पथलैया औद्योगिक कोरिडोरको थप ३४ वटा उद्योगको महसुल बिलिङमा गडबडी देखिएकोले अनुसन्धान भइरहेको उनले जानकारी गराए । हालै तिराइएको साढे ३ करोडमध्येबाट सबैभन्दा बढी १ करोड ३२ लाख विश्वकर्मा सिमेन्ट प्रालिबाट तिराइएको छ । वीरगंज आसपासका करिब ४०० उद्योगमा टोड मिटर जडान भएको छ । जसले वैज्ञानिकरूपमा २४ घण्टामा तीन प्रकारको महसुल उठेको जानकारी गराउँछ ।
बिहान ५ देखि बेलुका ५ बजेसम्म एउटा दर, साँझ ५ देखि राति ११ बजेसम्म दोस्रो दर र राति ११ देखि बिहान ५ बजेसम्म तेस्रो अर्थात् सबैभन्दा न्यून दरमा विद्युत् खपत हुने नियम छ । यही मिटरमा विविध कारणवश जानेर वा नजानेर पनि विद्युत् चुहावट हुने गर्छ । अनुसन्धानबाट कुन उद्योगबाट कति विद्युत् चुहावट भएको छ सो मिटरले सङ्कलन गरेको तथ्याङ्कबाट पत्ता लागेपछि विद्युत् प्राधिकरण वितरण केन्द्रले छानबिन गरी दाबीसहितको फाइल प्राधिकरणको बोर्डमा पठाएपछि माथिल्लो निकायको निर्धारणबाट थप छुट भएको महसुल तिराउने गरिन्छ ।
साथै, गत बुधवार बिहान पोखरिया वितरण केन्द्र, वीरगंज केन्द्र र कलैया वितरण केन्द्रले छुट्टाछुट्टै आप्mनो क्षेत्रमा गस्ती गरी करिब ७० जनालाई पक्राउ गरी जरिवाना तिराएको छ ।
कलैयाको टोलीले विभिन्न विद्युतीय उपकरणसहित ३९ जना, वीरगंजले १८ जना र पोखरियाले १३ जना गरी जम्मा ७० जनालाई नियन्त्रणमा लिई करिब ५ लाख रुपैयाँभन्दा बढीको क्षतिपूर्ति तिराएको छ ।
