प्रदेश नं २ मा वनजङ्गलको संरक्षण गर्ने उद्देश्यले प्रदेश सरकारले शुक्रवारदेखि हरित प्रदेश अभियान शुरु गरेको छ ।
प्रदेश २ का पर्सादेखि सप्तरीसम्मको आठवटै जिल्लामा आज एकै दिन ५० हजारभन्दा बढी बिरुवा रोपेर प्रदेश सरकारले अभियानको थालनी गरेको हो ।
अभियानको उद्घाटन मुख्यमन्त्री लालबाबू राउत गद्दीले पर्सामा बिरुवा रोपेर गरेका थिए । पर्सागढी नगरपालिका–३ को सबैया साझेदारी वनको पर्ती जग्गामा मुख्यमन्त्री गद्दीले सपेता प्रजातिको बिरुवा रोपेर अभियानको शुभारम्भ गरे । सबैया साझेदारी वनको १.५ हेक्टर पर्ती जग्गामा मसाला, कदम, टीक, सपेता, सिसौं, अमला प्रजातिका दुई हजार चार सय बिरुवा रोपिएको छ ।
अभियानको पहिलो दिन आज पर्सामा वृक्षरोपणका लागि विभिन्न प्रजातिका आठ हजार बिरुवा सर्वसाधारणलाई निश्शुल्क वितरण गरिएको डिभिजन वन कार्यालय पर्साका प्रमुख वन अधिकृत राजेश्वरमान श्रेष्ठले जानकारी दिए । बडनिहारमा अभियानको उद्घाटन गर्दै मुख्यमन्त्री राउतले प्रदेशमा विकासका नाममा सङ्घीय सरकारले जङ्गलको विनाश गर्न खोजिरहेको आरोप लगाए । उनले प्रदेशमा सबैभन्दा कम वनजङ्गल रहेको र भएको वनजङ्गल पनि विकासका नाममा सङ्घीय सरकारले विनाश गर्न खोजेको आरोप लगाए ।
बाराको निजगढमा प्रस्तावित दोस्रो अन्तर्राष्ट्रिय विमानस्थल निर्माणका क्रममा आठ हजार हेक्टर वनको करिब २४ लाख रूख काट्ने चर्चा चलाइएकोमा मुख्यमन्त्री गद्दीले प्रदेश सरकारको अनुमतिबेगर सङ्घीय सरकारले एउटा पनि रूख काट्न नपाउने बताए । उनले आपूm विकासविरोधी नभएको दाबी गर्दै निजगढमा अन्तर्राष्ट्रिय विमानस्थल बन्नुपर्छ तर विकासको नाममा वनजङ्गलको विनाश गर्न पाइँदैन भने । मुख्यमन्त्रीले वन प्रदेश सरकारको मातहतमा रहेकोले प्रदेश सरकारको अनुमतिबेगर सङ्घीय सरकारले एउटा पनि रूख काट्न नपाउने र आपूmले काट्न पनि नदिने चुनौती दिए ।
प्रस्तावित निजगढ विमानस्थलको डिपिआर नै तयार नगरी हचुवाका भरमा २४ लाख रूख काटेर जङ्गल मास्ने मनसायमा सङ्घीय सरकार लागेको भन्दै मुख्यमन्त्री गद्दीले आठ हजार हेक्टर वन मासेर बनाइने विश्वकै ठूलो विमानस्थल हामीलाई आवश्यक छ कि छैन औचित्य पुष्टि गर्न माग गरे । कति क्षेत्रफलमा विमानस्थल बनाउने, कति रूख काट्ने भनेर डिपिआर बनाउनुपर्छ अनिमात्र अरू प्रक्रिया अगाडि बढाउन उनले आग्रह गरे ।
मुख्यमन्त्रीले आठ हजार हेक्टर क्षेत्रफलको वन मासेर विमानस्थल बनाउनुभन्दा त्यसको विकल्पमा निजगढआसपासकै अरू स्थान खोज्न सुझाव दिए । उनले सिमरा विमानस्थलकै स्तरोन्नति गरेर अन्तर्राष्ट्रिय विमानस्थल बनाउन माग पनि गरे । उनले २४ लाख रूख मासेर प्रदेश सरकार अन्तर्राष्ट्रिय विमानस्थल बनाउने पक्षमा नरहेको उद्घोष पनि गरे ।
मुख्यमन्त्री गद्दीले हरित प्रदेश अभियानलाई औपचारिकतामा मात्र सीमित नराख्न उद्योग, पर्यटन, वन तथा वातावरण मन्त्रालयका सचिव र मातहतका कर्मचारीलाई निर्देशन पनि दिए । अभियान अन्तर्गत रोपिएका बिरुवाको संरक्षणमा ध्यान दिन आग्रह गर्दै उनले आपूmले दुई महिनापछि अहिले रोपिएका बिरुवाको स्थलगत अनुगमन गर्ने र अन्य जिल्लामा पनि प्रदेश सरकारका मन्त्री नियमितरूपमा स्थलगत अनुगमनमा रोपिएका बिरुवाको संरक्षण नभएको पाइए सम्बन्धित कर्मचारी कारबाहीको भागीदार हुने चेतावनी दिए ।
कार्यक्रममा २ नं प्रदेशका उद्योग, पर्यटन, वन तथा वातावरण मन्त्रालयका सचिव मेघनाथ काप्mलेले प्रदेश सरकारले थालेको अभियान अन्तर्गत चालू आर्थिक वर्षमा प्रदेशका आठवटै जिल्लामा एक करोडभन्दा बढी बिरुवा रोप्ने लक्ष्य रहेको जानकारी गराए । उनले वृक्षरोपण, वनजङ्गलको व्यवस्थापन र संरक्षणका लागि प्रदेश सरकारले चालू आर्थिक वर्षमा एक अर्ब तीन करोड रुपैयाँ बजेट विनियोजन गरेको पनि बताए । सचिव काप्mलेका अनुसार प्रदेशमा दुई लाख ६३ हजार हेक्टर अर्थात् देशको जम्मा ४.३६ प्रतिशत वन क्षेत्र रहेको छ।
त्यस्तै, बाराको फेटा गाउँपालिकामा रहेको खैरातीमाई सामुदायिक वनमा भौतिक पूर्वाधार विकासमन्त्री जितेन्द्र सोनल र रौतहटको चन्द्रपुर नगरपालिकामा रहेको दाबरी रङ्गपुर साझेदारी वनमा कृषि राज्यमन्त्री योगेन्द्रराय यादवले बिरुवा रोपेर अभियानको थालनी गरेका थिए ।
यस्तै, सर्लाहीको लालबन्दी नगरपालिकामा उद्योग, पर्यटन, वन तथा वातावरणमन्त्री रामनरेश राय, महोत्तरीको मटियानी नगरपालिकामा राज्यमन्त्री अभिराम शर्मा, धनुषाको धनुषाधाम नगरपालिकामा कानूनमन्त्री ज्ञानेन्द्रकुमार यादव र राज्यमन्त्री सरोज सिंह, सिरहाको बलानखोला सन्न्यासी साझेदारी वनमा गृहमन्त्री विजय यादव र राज्यमन्त्री सुरेशकुमार मण्डल तथा सप्तरीको सुरुङ्गा नगरपालिकामा राज्यमन्त्री उषा यादवले वृक्षरोपण गरेको २ नं प्रदेश सरकारले जानकारी गराएको छ ।
