मोफसलकै प्रतिष्ठित पूmटबल प्रतियोगिता रुस्लान सिमरा गोल्डकपको आठौ संस्करणको तयारी पूरा भएको छ ।
आयोजक नव जनजागृति युवा क्लबले सोमवार सिमरा रङ्गशालामा पत्रकार सम्मेलन गरी माघ २० गते प्रतियोगिता उद्घाटन हुने जानकारी दिएको हो ।
विजय डिस्टिलरीको मुख्य प्रायोजनमा प्रतियोगितामा ए डिभिजनका पाँच र मोफसलका पाँच १० टिमको सहभागिता रहने भएको छ । आयोजक क्लब अध्यक्ष एवं प्रतियोगिता मूल आयोजक कमिटीका संयोजक कासिम मियाँका अनुसार प्रतियोगितामा नेपाल आर्मीको त्रिभुवन क्लब, एपिएफ क्लब, सिएमजी सङ्कटा क्लब, हिमालयन शेर्पा क्लब र सरस्वती युथ क्लब सहभागी हुनेछन् । प्रतियोगितामा मोफसलका साबिक विजेता विजय युथ क्लब, उपविजेता वीरगंज युनाइटेड क्लब, सहारा क्लब पोखरा, रूपन्देही ११ र आयोजक नव जनजागृति युवा क्लबको सहभागिता रहने छ ।
अखिल नेपाल पूmटबल सङ्घका अध्यक्ष नरेन्द्र श्रेष्ठले उद्घाटन गर्ने प्रतियोगिताको विजेताले रु पाँच लाख ५१ हजार नगद प्राप्त गर्नेछ । उपविजेताले भने दुई लाख ५१ हजार प्राप्त गर्नेछ । प्रत्येक वर्ष पुरस्कार राशि वृद्धि गर्दै आएको आयोजकले यस वर्ष भने राशि वृद्धि नगरेर खेलाडी प्रोत्साहन भत्ता बढाएको छ । प्रतिस्पर्धामा जानुभन्दा पनि खेल खेल्ने खेलाडीलाई प्रोत्साहन दिन खेलाडी सुविधा वृद्धि गरिएको अध्यक्ष कासिम मियाँले जानकारी गराए ।
प्रतियोगिताको सर्वोत्कृष्ट खेलाडीले यामाहा मोटरसाइकल पाउनेछ । यसैगरी प्रतियोगिता अवधिमा उत्कृष्ट खेल प्रदर्शन गर्ने गोलरक्षक, डिफेन्स, मिडफिल्ड, फरवार्ड, सर्वाधिक गोलकर्ता र प्रशिक्षकलाई जनही रु १५ हजार पुरस्कार दिने क्लबका सचिव शम्भुसिंह ठकुरीले बताए । यस्तै प्रत्येक खेलको म्यान अफ द म्याच घोषित हुने खेलाडीलाई नगद पाँच हजार र ट्रफीले पुरस्कृत गरिने जानकारी ठकुरीले पत्रकार सम्मेलनमा दिए ।
आयोजकले यस वर्ष खेल अवधिमा हुने सम्भावित दुर्घटनालाई मध्यनजर गर्दै ६३ जनाको जीवन बिमा गरेको छ । अध्यक्ष मियाँका अनुसार खेलाडी, रेफ्री, दर्शक, पत्रकार र प्रतियोगितामा खटेका आयोजक क्लबका सदस्यको बिमा गरिएको हो । खेल अवधिमा घाइते भएमा ५० हजारसम्मको दुर्घटना बिमा र घाइते भई कसैको मृत्यु भएमा पाँच लाखसम्मको बिमा गरिएको अध्यक्ष मियाँले बताए ।
झन्डै ६९ लाखको अनुमानित बजेट रहेको प्रतियोगिताको तयारीका लागि आयोजकले ५१ सदस्यीय मूल आयोजक कमिटी र विभिन्न उपसमिति गठन गरेको थियो । मूल कमिटी र उपसमितिको सक्रियतामा आयोजकले खेल सञ्चालन गर्नका लागि आवश्यक सबै पूर्वाधार तयार पारेको छ । मैदान मरम्मत, रङ्गशाला घेर्ने, प्यारापीट
मरम्मतलगायत सबै पूर्वाधार तयार गर्ने काम सम्पन्न भएको सचिव ठकुरीले जानकारी दिए ।
खेल हेर्न आयोजकले प्यारापीट र मैदानको छुट्टाछुट्टै टिकट मूल्य निर्धारित गरेको छ । टिकटबाट सङ्कलित रकमको पाँच प्रतिशत विगत वर्षमा जस्तै वातावरण संरक्षणमा खर्चिने सचिव ठकुरीले बताए । प्रतियोगिता नजिकिंदै गएपछि सिमरालगायत आसपासका चोक सजाउने काम तीव्र पारिएको प्रचार उपसमिति संयोजक राजदास श्रेष्ठले जानकारी दिए ।
एकेडेमी सञ्चालन, रङ्गशाला निर्माणलगायत खेलकुद विकास गर्ने उद्देश्य लिएर सञ्चालित प्रतियोगितालाई सफल बनाउन यस क्षेत्रका उद्योगी–व्यवसायी, स्थानीयलगायतले सहयोग गरेका छन् । प्रतियोगिताको सहप्रायोजक पथलैया–वीरगंज औद्योगिक करिडोरका उद्योग, होटल र विभिन्न संस्था रहेको अध्यक्ष मियाँले पत्रकार सम्मेलनमा जानकारी दिए ।
