प्रस, वीरगंज, १७ वैशाख/
कुनै बेला तीनवटा जिल्ला कार्य समितिमा विभाजित एनेकपा माओवादी पर्सा सङगठन चन्दाको विषयलाई लिएर पुन: दुई चिरामा विभाजित भएको छ। एनेकपा माओवादी पर्सा सङगठनले शुक्रवार पत्रकार सम्मेलन गरी जिल्ला संयोजक बाबुराम कौशिकमाथि भ्रष्टाचारको आरोप लगाउँदै उनलाई पदबाट हटाइएको घोषणा गरेको छ। सङ्गठनका जिल्ला इन्चार्ज विजय महतोले कौशिकलाई पदबाट हटाएर रामदरश कुशवाहाको अध्यक्षतमा नयाँ कार्यसमिति गठन गरेको घोषणा गरेका थिए।
पत्रकार सम्मेलनमा कौशिकले पदको दुरुपयोग गरी आर्थिक सङगलन गरेको महतोको आरोप थियो।
चार महिना पहिले मात्र एनेकपा माओवादी उपाध्यक्ष पूर्व प्रधानमन्त्री बाबुराम भट्टराईले पार्टी परित्याग
गरेपछि तीन चिरामा विभाजित एमाओवादी पर्सा एक भएर बाबूराम कौशिकको अध्यक्षता कार्यसमिति बनेको थियो। शुक्रवार नेपाल पत्रकार महासङ्घ पर्साको सभाहलमा आयोजित पत्रकार सम्मेलनमा नयाँ गठित कार्यसमितका उपाध्यक्ष बालकृष्ण श्रेष्ठले निष्कासित कौशिकमाथि वीरगंज भन्सारलगायत दर्जनौं सरकारी कार्यालयमा लेटरप्याड दुरुपयोग गरी चन्दा आतङग मचाएको आरोप लगाए।
पत्रकार सम्मेलनमा श्रेष्ठले जिल्ला कार्यसमितिको बैठक नबोलाएको, संस्था नवीकरण गराउन नसकेको, पार्टी अध्यक्ष प्रचण्डलाई जिल्ला कमिटीको निर्णयबेगर बोलाएको, आर्थिक अनियमितता गरेको भन्दै उनलाई ६ महिनाको लागि निलम्बन गर्न केन्द्रीय कमिटीलाई सिफारिस गरी पठाएको पत्रकार सम्मेलनमा बताए।
यसबारे बाबूराम कौशिकसँग बुझ्दा उनले चन्दा सङगलनमा रोक लगाएपछि उनीहरू आफूविरुद्ध खनिएको प्रतिक्रिया दिए। उनले जिल्ला संयोजक भएको जानकारीसमेत नदिई पार्टीका केही नेताहरूले विभिन्न ठाउँबाट रकम असुल गरेको खबर पाएपछि एक साता अघि नै पार्टीको कुनै कार्यक्रम नरहेको र चन्दा नदिन सार्वजनिक प्रेस विज्ञप्ति जारी गरेपछि चन्दा माग्दै हिडनेहरूले झूटो लाञ्छना लगाएर बदनाम मात्र गर्न खोजेको बताए।
पत्रकार सम्मेलनमा एमाओवादीका अन्य नेताहरू, जिल्ला शिक्षा कार्यालय, वन कार्यालय, सिंचाइ कार्यालयलगायत अन्य कार्यालयहरूमा दिनभरि बस्ने, रकम उठाउने, टेन्डर लिने गरेको सूचना आफूसँग रहेको सञ्चारकर्मीहरूले राखेको जिज्ञासाको जवाफ दिंदै जिल्ला इन्चार्ज विजय महतोले पार्टीमा पनि यस विषयमा छलफल भइरहेको बताए। घटनाबारे आफूले जानकारी पाएको र उनीहरूविरुद्ध पनि कारबाई गरिने प्रतिबद्धता जाहेर गरे। जिल्ला विकासको लागि आएको रकम जथाभावी नेता, कार्यकर्ताहरूले खाएको उनको आरोप थियो। स्रोतका अनुसार केही दिन अगाडि सिंचाइमन्त्री उमेश यादव वीरगंज आउँदा उठाएको रकम बाँडफाँड गर्ने विषयमा विवाद भएको थियो। जिल्ला सिंचाइ कार्यालय डिभिजन नं. १ सँग एनेकपा माओवादीले ३ लाख माग गर्दा सो कार्यालयले ६५ हजारको चेक दिएको भन्दै कार्यकर्ताबीच नै हात हालाहाल भएको थियो। चन्दाकै विषयलाई लिएर सिंचाइमन्त्री बिजवनिया कार्यक्रमबाट फर्किने क्रममा केन्द्रीय सल्लाहकार जालिम मियाँले खानपिनको व्यवस्था गरे पनि केही समूहले उनको घरमा नलगी अन्यत्र खानपिन गराएको सो बेला चर्चाको विषय बनेको थियो। जालिम मियाँले आफ्नो घरमा तीनवटा खसी काटेर ठूलो भोजको व्यवस्था
गरे पनि मन्त्री त्याहा गएनन् र अन्य ठाउँमा खाना खाई वीरगंज फर्केपछि कार्यस्थलमा नै एमाओवादी, नेता, कार्यकर्ताबीच आरोप–प्रत्यारोप भएको थियो।
कौशिकलाई हटाएर शुक्रवार घोषणा गरिएको नयाँ कार्यसमितिको उपाध्यक्ष बालकृष्ण श्रेष्ठ, सचिव धनबहादुर श्रेष्ठ, सहसचिव मदिश मियाँ गद्दी, कोषाध्यक्ष दुर्गा क्षत्री, कार्यालय सचिव डा. हसिबु र्रहमान, कार्यालय सदस्य रामबाबू बैठा रहेका बताइएको छ।
त्यसैगरी बाबूराम कौशिकले पनि शुक्रवार प्रेस विज्ञप्ति जारी गर्दै तस्कर, चोर, फटाहालाई पार्टीले संरक्षण नगरेको कारण आफूमाथि आरोप लगाएको बताए । उनले आफूमाथि लगाइएको
आरोप प्रमाणित गर्न चुनौती पनि दिएका छन्।