संविधानले जनताको भावना समेटेको छ –मन्त्री पौडेल

प्रस, पथलैया, ९ असोज/
    युवा तथा खेलकुदमन्त्री एवं स्थानीय सभासद् पुरुषोत्तम पौडेलले सबै नेपाली जनताको भावना समेट्ने गरी संविधान निर्माण भएको र यसको पूर्ण कार्यान्वयनमा सबैले सहयोग गर्नुपर्ने बताएका छन्।
    डुमरवानास्थित समाज सुधार कृषि सहकारी संस्थाको तेस्रो वार्षिक साधारणसभाको अवसरमा आयोजित कार्यक्रममा बोल्दै मन्त्री पौडेलले असन्तुष्ट पक्षले वार्तामा आएर समाधान निकाल्दै मुलुकलाई एकीकृत र समृद्ध बनाउन लाग्नुपर्ने पौडेलले बताए। नेपालको संविधान सहकारीमैत्री भएको बताउँदै पौडेलले सहकारीहरू आम नागरिकलाई उद्यमी बनाएर सामाजिकरूपमा एकताबद्ध भएर लाग्नुपर्ने बताए।
    नेपाल बचत तथा ऋण केन्द्रीय सहकारी सङ्घ (नेफ्स्कून)का सञ्चालक कृष्ण पौडेलले सहकारी क्षेत्रको सहभागिता र स्वतन्त्र विकासमार्फत् राष्ट्रिय अर्थतन्त्र सुदृढ गर्ने संविधानले उद्घोष गरेको बताए। पौडेलले सहकारी क्षेत्रलाई संविधानले सम्बोधन गरेकाले यसको कार्यान्वयन भए आर्थिक– सामाजिक रूपान्तरणमा सहकारीको भूमिका महत्त्वपूर्ण हुने बताए।
    कार्यक्रममा उत्कृष्ट किसानहरू मानबहादुर भण्डारी र वरुण गौतम, उत्कृष्ट कारोबारकर्ताहरू प्रह्लाद साह सोनार, निश्चल थापा, सोममाया घलान, मीनाकुमारी चौधरी, ज्येष्ठ सदस्य रामकुमारी पुडासैनी, उत्कृष्ट कर्मचारी पवित्रा कँडेल, छात्रवृत्ति पुरस्कार रोशनी खातुन र सहयोगी संस्था बिजनेस नेपाल कन्सल्टेन्सीलाई सम्मान गरिएको थियो । सोही अवसरमा संस्थाले मन्त्री पौडेललाई अभिनन्दनसमेत गरेको थियो।
    संस्थाका अध्यक्ष नारायणदत्त अधिकारीको अध्यक्षतामा सम्पन्न कार्यक्रममा साना किसान कृषि सहकारी सङ्घका अध्यक्ष शिव अधिकारी, डिभिजन सहकारी कार्यालय बाराका प्रमुख कुलोत्तम पोखरेल, डुमरवाना बहुमुखी क्याम्पसका प्रमुख किशोर शर्मा, बारा जिल्ला बचत तथा ऋण सहकारी सङ्घका सञ्चालक राजु अधिकारी, हलखोरिया साझेदारी वन व्यवस्थापन समितिका अध्यक्ष राजकुमार अर्याल, डुमरवाना दुग्ध उत्पादक सहकारी संस्थाका व्यवस्थापक दीपक घिमिरेलगायतले मन्तव्य राखेका थिए। कार्यक्रमको सहजीकरण व्यवस्थापक रवीन्द्र भण्डारीले गरेका थिए।
    उद्घाटन समारोहपछि आयोजित बन्दसत्रले संस्थाको प्रगति प्रतिवेदन र लेखा समितिका प्रतिवेदनहरू सुझावहरूसहित पुन: नारायणदत्त अधिकारीको अध्यक्षतामा एघार सदस्यीय सञ्चालक समिति चयन गरेको छ। समितिमा उपाध्यक्ष केशव काफ्ले, सचिव सीमा ठकुरी, कोषाध्यक्ष रामचन्द्र लामिछाने र सञ्चालकहरू नवराज ढकाल, कुमार श्रेष्ठ, पार्वती अधिकारी, शहीद मियाँ, शोभा विश्वकर्मा, ठाकुर ढुङगाना र दीपक कार्की चयन भएका छन् । लेखा समितिमा संयोजक रामकुमार अर्याल र सदस्यहरू कृष्णप्रसाद दाहाल र देवकी ढुङगाना निर्वाचित भएका निर्वाचन प्रमुख किशोर शर्माले जानकारी दिए। 
    यसैगरी सिमरास्थित सिमरा महिला बचत तथा ऋण सहकारी संस्थाको आठौं वार्षिक साधारणसभा शनिवार सम्पन्न भएको छ। वार्षिक साधारणसभाको उद्घाटन गर्दै नेफ्स्कूनका सञ्चालक कृष्ण पौडेलले सहकारीका सबै सदस्यहरू संविधानले दिएको राष्ट्रिय समृद्धिको कार्यभार पूरा गर्न क्रियाशील हुनुपर्ने बताए ।
    संस्थाकी अध्यक्ष अनीता लम्सालको अध्यक्षतामा सम्पन्न कार्यक्रममा बारा जिल्ला बचत तथा ऋण सहकारी सङ्घका अध्यक्ष भोला गौतम, जनहित उपभोक्ता समितिका अध्यक्ष अमृतलाल श्रेष्ठ, डिभिजन सहकारी कार्यालयका प्रमुख कुलोत्तम पोखरेललगायतले मन्तव्य राखेका थिए। कार्यक्रमको सञ्चालन सचिव निर्मला सुवेदी पौडेलले गरेकी थिइन् भने गीता शर्माले सञ्चालन गरेकी थिइन्।
    यसैगरी औराहस्थित घण्टीमाई बचत तथा ऋण सहकारी संस्थाको तेस्रो वार्षिक साधारणसभा शनिवार सम्पन्न भएको छ। डिभिजन सहकारी कार्यालयका कार्यालय प्रमुख कुलोत्तम पोखरेलेको प्रमुख आतिथ्य र संस्थाकी अध्यक्ष कोपिला सिम्खडाको अध्यक्षतामा कार्यक्रम सम्पन्न भएको थियो।