नजिकिंदो चाडपर्वलाई लक्षित गर्दै जिल्ला प्रहरी कार्यालयले विशेष सुरक्षा योजना लागू गरेको पर्साका प्रहरी उपरीक्षक दिवेश लोहनीले जानकारी गराएका छन् ।
जिल्ला प्रहरी कार्यालय पर्सामा आज आयोजित शुभकामना आदानप्रदान कार्यक्रममा उपरीक्षक लोहनीले विशेष सुरक्षा योजना लागू गरिएको बताए ।
उनले विशेष सुरक्षा योजना तीन महिनाभित्र पर्ने दशैं, तिहार, छठ तथा बकरीद पर्वलाई लक्षित गरेर सञ्चालन गरिने र यसका लागि मध्य क्षेत्र प्रहरी कार्यालय, हेटौंडाबाट थप सयजना र अञ्चल प्रहरी कार्यालय वीरगंजबाट ४० जना सुरक्षा जनशक्ति माग गरिएको बताए ।
चाडपर्वमा हुने चोरी, डकैती, लुटपाटका घटना नियन्त्रणका लागि विशेष सुरक्षा योजना अन्तर्गत सादा पोसाक र टाइगर मोबाइल प्रहरी टोलीले २४ सैं घण्टा काम गर्ने योजना बनाएको प्रउ लोहनीले बताए ।
चाडपर्वमा भड्किलो खर्ज नगर्न आफूहरूले विभिन्न सञ्चारमाध्यमबाट सूचना प्रभावसमेत गरेको बताउँदै उपरीक्षक लोहनीले प्रहरीले शून्य सहनशीलता र मुस्कानसहितको प्रहरी सेवा आम जनसमुदायलाई उपलब्ध गराउनेतर्फ पनि विशेष ध्यान दिएको दाबी गरे ।
सो अवसरमा लोहनीले मदिरापसल सञ्चालनका लागि पहिचान खुल्ने वातावरण बनाई सीसी क्यामरा जडान गरी होटल सञ्चालन गरेमा प्रहरीको कुनै आपत्ति नरहेको बताए । मदिरा सेवन गर्दा आपराधिक घटनाका साथै दुर्घटना बढी हुने भएकोले व्यक्तिको पहिचान खुल्ने गरी मदिरापसल सञ्चालन भएमा प्रहरीले कुनै अवरोध नपुर्याउने प्रस्ट्याए ।
“वीरगंजका मदिरापसलहरू निर्धक्क साथ रातभरि खुलोस् भन्ने मेरो चाहना हो । यस सम्बन्धमा वीरगंज उद्योग वाणिज्य सङ्घका अध्यक्ष अशोककुमार बैद्यसँग कुरा भइरहेको छ । प्रहरीले २४ सैं घण्टा सुरक्षाको व्यवस्था मिलाएपछि सर्वसाधारण जनता रातभरि निर्धक्कसँग बजार गर्न र घुमफिर गर्न पाऊन् भन्ने मेरो चाहना हो,” उपरीक्षक लोहनीको भनाइ थियो ।
शैलेन्द्र झा, रौतहट/
जिल्ला प्रहरी कार्यालय रौतहटका प्रहरी उपरीक्षक सानुबाबू थपलियाले जिल्लाको शान्ति सुरक्षाका लागि आफूहरू सधैं तत्पर रहेको बताएका छन् ।
जिप्रका रौतहटद्वारा आज आयोजित पत्रकार सम्मेलनमा उपरीक्षक थपलियाले चाडपर्वमा हुन सक्ने अप्रिय घटना एवं स्थितिबारे पूर्वजानकारी लिन र समयमा नियन्त्रण गर्न प्रहरी सतर्कता बढाएको बताए ।
उनले चोरी, डकैती, लुटपाट, जुवातास, मादक पदार्थ सेवन, वेश्यावृत्ति, कालोबजारी, कृत्रिम अभावलाई नियन्त्रण गर्न तथा सवारी आवागमन सहज बनाइ सम्भावित सवारी दुर्घटनालाई रोक्ने उद्देश्यले विशेष सुरक्षा योजना बनाइएको जानकारी गराए ।
कार्यक्रममा उनले बडादशैं, तिहार, छठ तथा बकरीद पर्वको शुभकामनासमेत व्यक्त गरेका थिए ।
कार्यक्रममा जिप्रका रौतहटका प्रहरी नायब उपरीक्षक भीमप्रसाद ढकालले जिल्लाको शान्ति सुरक्षाबारे चर्चा गरेका थिए ।
