सिकेन्द्र पासवान, कलैया, १० कात्तिक/
दोस्रो संविधानसभा निर्वाचनमा नेकपा एमालेबाट बारा क्षेत्र नं. ४ का तत्कालीन उम्मेदवार महमुद आलमको हत्याको मुख्य योजनाकार एमालेकै पूर्वसभासद् रामचन्द्र प्यासी रहेको दाबी प्रहरीले गरेको छ ।
केन्द्रीय अनुसन्धान ब्यूरोले आज कलैयामा पत्रकार सम्मेलन गरी आलम हत्याकाण्डमा संलग्न भएको आरोपमा पक्राउ परेका पूर्वसभासद् प्यासीसहित तीनजनालाई आज सार्वजनिक गरेको हो ।
नेपाल मुस्लिम इत्तेहाद स·ठनका केन्द्रीय अध्यक्षसमेत रहेका महमुद आलमलाई असोज १८ गते बिहान ११:३५ बजे बाराको लिपनीमाल वडा नं. १ स्थित वीरगंज–पथलैया सडकखण्डमा पर्ने चाबोसती दाना मिलअगाडि भारतीय नम्बर प्लेट भएको मोटरसाइकलमा सवार अज्ञात समूहले गोली हानी गम्भीर बनाएको थियो । उपचारको क्रममा आलमको असोज २४ गते काठमाडौंस्थित शिक्षण अस्पतालमा मृत्यु भएको थियो ।
एमालेको राष्ट्रिय प्रतिनिधि परिषद् सदस्यसमेत रहेका प्यासीले ६ महिना पहिलेदेखि आलमको हत्या गर्न योजना बनाइरहेका र उक्त कार्यका लागि भारतको रक्सौलका बर्मा भन्ने राजु श्रीवास्तवसँग पटक–पटक छलफल गरी योजना बनाएको प्रहरीको दाबी छ ।
आलमको घर, उनी बस्ने विभिन्न स्थानको विवरण, आलमको उठबस तथा उनको दैनिक क्रियाकलापबारे सुटरहरूलाई सूचना दिने कार्यसमेत प्यासीले नै गरेको प्रहरीले पत्रकार सम्मेलनमा बताएको थियो ।
उम्मेदवारी दर्ताका दिन आलम चढेको बा. ५ च ३३२९ नं.को कालो टाटासुमो गाडीबारे जानकारी, आलम काठमाडौंबाट बारा आएको सूचना सुटरहरूलाई प्यासीले नै गराएको भन्दै हत्याका मुख्य योजनाकार प्यासी नै रहेको केन्द्रीय अनुसन्धान ब्यूरो प्रमुख प्रकाश अर्यालले बताए ।
अनुसन्धान ब्यूरोले सोही घटनामा संलग्न रहेको अभियोगमा भारतका सिभिल लाइन अलिगढ घर भई हाल लक्ष्मीटोल, वीरगंज–४ मा बस्दै आएका ४२ वर्षीय अतिक खान, भारतीय सीमावर्ती शहर रक्सौलको ४ डंकन रोड निवासी ३८ वर्षीय राजु श्रीवास्तव ‘बर्मा’लाई समेत पक्राउ गरी सार्वजनिक गरेको छ ।
पक्राउ परेका खानको पेशा नै पैसा लिएर मान्छे मार्ने रहेको र बर्माले खानका लागि सूचक एवं व्यवस्थापकको काम गरेको पत्रकार सम्मेलनमा ब्यूरो प्रमुख अर्यालले बताए ।
केन्द्रीय अनुसन्धान ब्यूरोले पत्रकार सम्मेलनमा बताएअनुसार भदौ १४ गते आलमको हत्या गर्नका लागि भारतबाट तीनजना सुटरहरू रक्सौल हुँदै वीरगंज आएका थिए । उनीहरू वीरगंजस्थित होटल रानीपोखरीको कोठा नं. १०३ मा बसेका तर उक्त समयमा आलम काठमाडौं गएका कारण योजना सफल हुन सकेको थिएन । तीनजना सुटरमध्ये दुईजना सुटरका साथ अन्य दुईजना आलमलाई पछ्याउँदै काठमाडौं पुगेका थिए । सोही समयमा उनीहरूले काठमाडौंस्थित जोरपाटीमा कपडा सिलाउने भारत मोतीहारी हिरमुनीका ४० वर्षीय मोहम्मद समसुल हकमाथि गोली प्रहार गरेका थिए । चारजनाको सो टोलीमा हाल ब्यूरोले पक्राउ गरेको अतिक खान पनि सहभागी थिए ।
जोरपाटी गोलीकाण्डमा गिरोहका दुईजना सदस्य पक्राउ परेपछि काठमाडौंमैं आलमको हत्या गर्ने योजना विफल भएको थियो । आलम काठमाडौंबाट बारा आएलगत्तै अतिक खानसँग सम्पर्क गरी सुटरहरू वीरगंज आई घण्टाघरनजिकैको एक गेस्ट हाउसमा बसेका थिए ।
घटनाका दिन बिहानै सुटरहरू आलमको घरनजिकै पुगेर पिछा गर्दै दाना मिलअगाडि पुगेर गोली प्रहार गरेका थिए ।
घटनामा संलग्नमध्ये हालसम्म तीनजनालाई पक्राउ गरिएको, एकजना योजनाकार दुबईमा रहेको र आलममाथि गोली प्रहार गर्ने सुटरहरू भने घटनामा प्रयोग भएको मोटरसाइकल वीरगंजस्थित एभरेस्ट लजनजिक छाडेर भारत फरार भएकाले निजहरूको खोजी कार्य तथा अनुसन्धान कार्य जारी रहेको केन्द्रीय अनुसन्धान ब्यूरोले जनाएको छ ।
पत्रकार सम्मेलनमा सुटरहरूको हुलिया पनि सार्वजनिक गरिएको थियो । पत्रकार सम्मेलनमा बाराका प्रमुख जिल्ला अधिकारी दिनेश भट्टराई, प्रहरी नायब महानिरीक्षक विज्ञानराज शर्मा, नारायणी अञ्चलका वरिष्ठ प्रहरी उपरीक्षक सर्वेन्द्र खनाल, बाराका प्रहरी उपरीक्षक ठाकुरप्रसाद ज्ञवाली, सशस्त्र प्रहरी उपरीक्षक कालीदास धौजु र राष्ट्रिय अनुसन्धानका बारा प्रमुख अच्युत पन्तको उपस्थिति थियो ।
यसैगरी भदौ ३१ गते निजगढ–८ निवासी ३८ वर्षीय भगवान बडालको अपहरणमा संलग्न रहेको आरोपमा रौतहट कनकपुर–५ बस्ने वर्ष ४० को रावण माझी, ४३ वर्षका दिलीप माझी, रावण माझीकी श्रीमती ३४ वर्षीया फूलमाया माझी, २३ वर्षीया मीना माझी, ६० वर्षीया रेखाकुमारी माझी, मकवानपुर जिल्ला अढाई गाउँ वडा नं. ८ बस्ने ३० वर्षका रामबहादुर माझी, कनकपुर–५ घर भई माइतीघर रतनपुरी–१ बस्दै आएकी २७ वर्षीया विद्यादेवी कछरियालाई प्रहरीले आज सार्वजनिक गरेको थियो ।
सार्वजनिक गरिएका अभियुक्तहरूको घरबाट भरुवा बन्दुक १ थान, मार्क फोरको गोली ५ राउन्ड, नगद २ लाख, मोबाइल ९ थान र मोटरसाइकल २ थान बरामद गरिएको बाराका प्रहरी नायब उपरीक्षक नवराज अधिकारीले बताए ।
