प्रस, वीरगंज, १६ माघ/शहीद दिवस मनाउने क्रममा आज नेपाली काङ्ग्रेस वीरगंज नगर कार्यसमितिले नाउक्षे अस्पताल र गण्डक चोकमा रहेको शहीद थिरबम मल्ल र तेजबहादुर अमात्यको सालिकमा माल्यार्पण गरेको छ ।
नेका पर्साका सभापति सुरेन्द्रप्रसाद चौधरी, पूर्वसभापति राजेन्द्रबहादुर अमात्य, नगर कार्यसमिति सभापति महम्मद सहाबुद्दिनलगायतले शहीद मल्लको सालिकमा माल्यार्पण गरेका थिए ।
माल्यार्पणपछि आयोजित सभालाई कार्यक्रमका प्रमुख अतिथि नेका पर्साका सभापति सुरेन्द्रप्रसाद चौधरीले सम्बोधन गर्दै एकीकृत माओवादीले चोर, फटाहा, लुटेरा, हत्याराहरूलाई शहीद घोषणा गरेर वास्तविक शहीदको अपमान गरेको आरोप लगाए । उनले गाउँका धान चोर र शहरका गुन्डाहरू शहीद बनाइएकोमा आपत्ति प्रकट गरे ।
शहीद दिवसको अवसरमा आज नेका वीरगंज नगर कार्यसमितिले राजेश्वरप्रसाद सिंह, दिलीप राजभण्डारी र हाजी महम्मद इजहारलाई दोसल्ला ओढाइ सम्मानित गरेको थियो । यसैगरी अस्पतालबाट मोटरसाइकल र्यालीसहित गएको जुलुसले गण्डकस्थित शहीद तेजबहादुर अमात्यको सालिकमा माल्यार्पण गरेको थियो ।
यसैगरी राष्ट्रिय मधेसी शहीद उद्यानले शहीद दिवसको अवसरमा र्याली र सभा गरेको छ ।
उद्यानको कार्यालयबाट निस्केको जुलुस घण्टाघरमा पुगी सभामा परिणत भएको थियो । सभालाई सम्बोधन गर्दै मधेसी जनअधिकार फोरम मधेसका अध्यक्ष भाग्यनाथ गुप्ताले मधेसी दलहरू सत्तामोहमा पँmसेर मधेस मुद्दालाई बिर्सेको आरोप लगाए । उनले मधेसी दलहरूबीच एकताको अभाव भएको कारण पनि मधेसी मुद्दा ओझेलमा परेको बताएका थिए ।
उनले वर्तमान सरकार पूर्णरूपमा असफल भएको बताउँदै स्वतन्त्र व्यक्तिको नेतृत्वमा निर्वाचन सरकारको गठन गर्नुपर्ने बताए ।
पूर्वमन्त्री करिमा बेगमले मधेसको मुद्दालाई आफूले ओझेलमा पर्न नदिने प्रतिबद्धता जाहेर गरेकी थिइन् । उनले रगत बगाउनुपरे पनि पछि नहट्ने उद्घोष गरिन् ।
पूर्वमन्त्री दुर्गा देवीले सङ्घीयतासहितको संविधानको पक्षमा आफ्नो पार्टी फोरम लोकतान्त्रिक अडिग रहेको बताइन् । सभालाई फोरम लोकतान्त्रिकका जिल्ला अध्यक्ष हरेन्द्र सिंह, राष्ट्रिय मधेसी समाजवादी पार्टी पर्साका अध्यक्ष महावीर शर्मा, फोरम नेपाल पर्साका सचिव उमेश सहनीलगायतले सम्बोधन गरेका थिए । कार्यक्रम राष्ट्रिय मधेसी शहीद उद्यानकी अध्यक्ष त्रिपतिदेवी चौधरीको अध्यक्षतामा भएको थियो ।
कविता प्रतियोगिता तथा श्रष्टा सम्मानित
गौरी कँडेल, हेटौंडा/
शहीद दिवसको अवसरमा शक्ति एफएमको आयोजनामा साहित्यिक जमघट तथा कविता प्रतियोगिता सम्पन्न भएको छ ।
एफएमका सञ्चालक मनोहर ढकालको सभाध्यक्षता तथा स्तम्भकार आनन्दराम पौडेलको प्रमुख आतिथ्यमा कार्यक्रम सम्पन्न भएको थियो । १४ जना कवि–कवियत्रीहरूको सहभागिता रहेको प्रतियोगितामा निर्णायकमण्डलले ७ वटा कवितालाई उत्कृष्ट ठहर्याएको थियो ।
अर्जुन क्षितिज, सुवास खनाल, भानुभक्त विष्ट, जेनन नेपाल, छवि अनित्य र दिल दिवानाका कविताहरू उत्कृष्टमा परेका थिए । उत्कृष्ट ७ कविताहरूमध्ये दिल दिवानाको शहीद शुक्रराजको खुलासा शीर्षकको कविता सर्वोत्कृष्टमा परेको थियो । दिवानालाई रु.११ हजार १ सय ११ नगद दिएर सम्मानित गरिएको थियो ।
कार्यक्रममा नेपाली भाषा तथा साहित्यको क्षेत्रमा महत्त्वपूर्ण योगदान पुर्याउने मकवानपुरका श्रष्टाद्वय स्तम्भकार आनन्दराम पौडेल, मुक्तक तथा गजल साधक पुरुषोत्तम आचार्यलाई सम्मानपत्र दिएर सम्मानित
गरिएको थियो ।
कार्यक्रममा तुलसी घिमिरे, मातृभूमि साहित्यिक समाजका अध्यक्ष राजबाबू पहाडी, गजल मञ्च मकवानपुरका सचिव वसन्त खरेली, साहित्य स·म मकवानपुरका सचिव एसके निधन, साहित्यकार निमेष निखिल लगायतले मन्तव्य व्यक्त गरेका थिए ।
