वातावरण तथा पर्यावरण संरक्षण समिति भवानीपुर सुखचैना पर्साले लिपनीमाल–८ मा रहेका उद्योगहरूबाट हुने प्रदूषण टुङ्गो नलागेको भन्दै आन्दोलन घोषणा गरेपछि आज चाचान समूहले पत्रकार सम्मेलनको आयोजना गरेर आफ्नो उद्योगले वातावरण प्रदूषण नगरेको दाबी गर्नुका साथै अनाहकमा बदनाम गराउने काम भएको आरोप लगाएको छ ।
चाचान समूहका अध्यक्ष बाबूलाल चाचानले नारायणी सिमेन्ट उद्योग प्रालि परिसरमा पत्रकार सम्मेलनको आयोजना गरी सर्वोच्च अदालतको फैसलाको सम्मान गर्दै आफूले नारायणी छाला उद्योगलाई लिपनीमाल गाविसबाट रामपुर टोकनीमा सारेको र हाल त्यहाँ रहेका नारायणी आयल रिफाइनरी, नारायणी दाल मिल र नारायणी सिमेन्ट उद्योग प्रालिमा अत्याधुनिक १७ वटा ब्याग फिल्टर करिब पाँच करोडको लागतमा जडान गरेको, त्यस्तै खरानी नियन्त्रण गर्ने अत्याधुनिक प्रविधि अपनाएको र १०८ फिट लामो चिम्नीबाट हावामात्र बाहिर निस्कने गरेको बताए । उनले स्थानीय पर्सा–बाराका प्रशासन, वातावरण विज्ञान तथा प्रविधि मन्त्रालय, उद्योग वाणिज्य तथा आपूर्ति मन्त्रालय समेतको टोलीले उद्योगको स्थलगत निरीक्षण गरी प्रतिवेदन पेश गरेको र सो प्रतिवेदनमा प्रदूषण व्यवस्थापन सन्तोषजनक भएको उल्लेख हुँदाहुँदै प्रदूषण नियन्त्रणको सबै मापदण्ड पूरा गरेको उद्योगलाई बदनाम गर्ने हिसाबले दुष्प्रचार भएकोमा चिन्ता व्यक्त गरे ।
अध्यक्ष चाचानले उद्योगमा स्थानीय युवकहरू रोजगारमा सम्मिलित रहेको र उनीहरूबाट कुनै पनि किसिमको टीका–टिप्पणी नभएको तथा उद्योगका आधिकारिक ट्ेरड युनियन कर्मचारीहरूले उद्योगमा प्रदूषण नपाएको तर उद्योगलाई बदनाम गर्ने हिसाबले केही व्यक्ति लागिपरेको बताए । उनले प्रदूषणको कारण बालीनाली नष्ट भएको जस्ता आरोप मनगढन्ते भएको बताए ।
पत्रकार सम्मेलनका प्रमुख अतिथि वीरगंज उद्योग वाणिज्य सङ्घका अध्यक्ष अशोक टेमानीले वातावरण प्रदूषण सम्बन्धमा संवेदनशील हुनु राम्रो पक्ष भए पनि हुँदै नभएको प्रदूषणको कुरा उठाएर मापदण्ड पूरा गरेको उद्योगलाई बदनाम गर्न खोज्नु असल कार्य नभएको बताए । उनले उद्योग वाणिज्य सङ्घ, असल उद्योगी व्यापारीको हकमा सदैव साथ रहेको बताएका थिए ।
पत्रकार महासङ्घ पर्साका अध्यक्ष केसी लामिछानेले आफूलगायत पत्रकारहरूको टोलीले निरीक्षण गर्दा उद्योगमा प्रदूषण प्रभावित अवस्था नदेखेको बताए । उनले प्रदूषणको मापदण्ड पूरा नगरेका उद्योगहरूको हकमा आन्दोलन जायज हुने तर मापदण्ड पूरा गरेको उद्योगहरूको हकमा आन्दोलनको औचित्य नरहेको बताए ।
पत्रकार सम्मेलनमा नारायणी सिमेन्टका कार्यकारी निर्देशक उमेशचन्द्र ठाकुर, इन्जिनियर बलराम यादव, रिपोर्टर्स क्लबका कन्हैया गुप्तालगायतको सहभागिता थियो । पत्रकार सम्मेलनपूर्व चाचान समूहका अध्यक्ष बाबूलाल चाचानले तीनवटै उद्योगहरू पत्रकारहरूलाई अवलोकन गराएका थिए । सम्मेलनमा छापा, श्रव्य दृश्यका गरी करिब ५० जना पत्रकारहरूको सहभागिता थियो ।
यता वातावरण तथा पर्यावरण संरक्षण समितिले भदौ ६ गतेदेखि आन्दोलन घोषणा गरेको छ । घोषित आन्दोलन अनुसार उद्योगपति र स्थानीय प्रशासनलाई भदौ ६ गते ७२ घण्टे अल्टिेमटम दिएको छ भने ९–११ गतेसम्म वीरगंज, पथलैया, कलैयामा पम्पलेटिङ गरिएको छ । त्यस्तै सोही ठाउँमा १२ गतेदेखि आजसम्म भित्तेलेखन कार्य गरिएको छ । वीरगंज घण्टाघर र कलैया भरतचोकमा १५–१८ गतेसम्म हस्ताक्षर सङ्कलन गर्ने, २० गते विरोध र्यालीसहित जिप्रका पर्सा घेराउ गर्ने, पहिलो चरणको आन्दोलन तोकिएको छ भने दोस्रो चरणमा भदौ २२ गते चैनपुर चोकमा २ घण्टा राजमार्ग ठप्प पार्ने र २४–२६ गतेसम्म रिले अनशन र २७ गतेदेखि आमरण अनशनमा बस्ने जानकारी गराइएको छ ।
समितिले नारायणी रिफाइनरी उद्योग, दाल उद्योग, त्रिशक्ति सिमेन्ट, चाबोसति, दुग्गड गु्रप, अमृत वनस्पति लगायत उद्योगहरूको चिम्नीबाट निस्कने धूवाँ, छाइलगायतले आसपासका गाउँबस्तीमा प्रदूषण फैलाएर मानिसको स्वास्थ्यमा प्रतिकूल असर पारेको भन्दै आन्दोलनको घोषणा गरेको हो
