एकीकृत नेकपा माओवादीका अध्यक्ष पुष्पकमल दाहाल ‘प्रचण्ड’ले प्रमुख दलहरूबीच पुन: संवाद शुरु भएको बताएका छन् ।
क्रान्तिकारी पत्रकार सङ्घ, पर्साद्वारा आयोजित पत्रकार सम्मेलनमा अध्यक्ष दाहालले असहमतिको कारण बन्द संवाद शुरु भएको बताए । उनले भोलि भदौ १३ गते बुधवार प्रमुख दलबीच दुई बुँदामा छलफल हुने जानकारी गराए । निर्वाचनमा जाने अथवा संविधानसभा पुनस्र्थापना गर्ने भन्ने विषयमा मात्र छलफल हुने बताए । अध्यक्ष दाहालले सोही सन्दर्भमा सङ्घीय गणतान्त्रिक, लोकतान्त्रिक मोर्चाको आज साँझ बैठक बोलाइएको पनि जानकारी गराएका थिए । उनले सहमतिका लागि आफूहरू बहुतै गम्भीर भएको दाबी गरे ।
“हामी सहमतिका लागि गम्भीर छौं”– भन्दै अध्यक्ष दाहालले आफ्नो पहलमा भएको छलफल वार्ताहरू अबका दिनमा सफल हुने आशा व्यक्त गरे । उनले वीरगंज आउनुपूर्व बिहान राष्ट्रपतिसँग भेट गरेको र राष्ट्रपति राष्ट्रिय सहमतिको लागि चिन्तित रहेको बताए ।
पत्रकार सम्मेलनमा अध्यक्ष दाहालले आजसम्मका प्रयासहरू तीता मात्र रहेको भन्दै आगामी दिनमा तीता अनुभव बोक्नु नपर्ने र मीठा अनुभव प्राप्त हुने बताए । पत्रकार सम्मेलनमा क्रान्तिकारी पत्रकार सङ्घ, पर्साका अध्यक्ष आरके पटेलको अध्यक्षतामा भएको थियो ।
आजै अध्यक्ष दाहालले ठाकुर राम बहुमुखी क्याम्पसमा निर्मित सुजनराज पाण्डेको सालिक अनावरण गरेका थिए । जनयुद्धताका रौतहटमा मारिएका पाण्डे सहायक कमान्डर थिए ।
यसैबीच ए. नेकपा माओवादीका अध्यक्ष पुष्पकमल दाहाल भोजपुरा राज्य समितिद्वारा आयोजित वैचारिक तथा राजनीतिक प्रशिक्षणमा सहभागी भएका थिए । कार्यव्यस्तताको कारण अध्यक्ष दाहाल एक घण्टा १९ मिनेट लामो भाषण गरी राजधानी फर्के । आजको प्रशिक्षणमा उनीबाहेक स्वागत र अध्यक्षले समापन मात्र गरेका थिए ।
प्रशिक्षणमा बोल्दै अध्यक्ष दाहालले मधेस आन्दोलनमा माओवादी चुकेको स्विकारे । उनले मधेस आन्दोलनमा माओवादी चुक्नुको कारण तत्कालीन नेता मातृका यादव रहेको आरोप लगाए । उनले यादवको पागलपनकै कारण माओवादी मधेस आन्दोलनमा चुकेको बताए । अध्यक्ष दाहालले मधेससँग अबको सम्बन्ध सुधार्दै लग्ने प्रतिबद्धता जाहेर गरे । अध्यक्ष दाहालले आजको कार्यक्रममा प्रमुख राजनीतिक दलहरूलाई गाली गरेनन् । उनले भने संविधानसभामा रहेका ३३ दलमध्ये २१ दलको मोर्चा आफ्नो नेतृत्वमा बनेपछि अन्य दलहरू तर्सेका छन् । उनले वर्तमान सरकार समस्याको बाधक नभएको प्रस्ट्याए ।
अध्यक्ष दाहालले माओवादीले सत्ता कब्जा गर्ने फगत हल्ला चलाइए पनि निर्वाचनबाट भने सत्ता कब्जा गर्ने चुनौती दिए ।
प्रस पथलैया/
एकीकृत नेकपा माओवादीका अध्यक्ष पुष्पकमल दहाल ‘प्रचण्ड’ले राजनीतिक दलहरूबीच नयाँ ढ·ले सहमति प्रयास शुरु भएको बताएका छन् ।
भोजपुरा राज्य समितिस्तरीय कार्यकर्ता प्रशिक्षण कार्यक्रममा सहभागी हुन वीरगंज जाने क्रममा म·लवार सिमरा विमानस्थलमा सञ्चारकर्मीसँग सङ्क्षिप्त कुरा गर्दै प्रचण्डले राजनीतिक दलहरूबीच चलिरहेको छलफल सरकार परिवर्तनका विषयमा मात्र नभई समग्र राजनीतिक निकासको विषयमा केन्द्रित भएकोले अन्तिम निष्कर्ष निस्कने बताएका छन् ।
कार्यकर्ताद्वारा पत्रकारलाई रोक
ए. नेकपा माओवादी अध्यक्ष प्रचण्डको स्वागतमा नेता, कार्यकर्ता धावन मार्गमा निर्धक्क पसिरहँदा स्थानीय कार्यकर्ताहरूले सञ्चारकर्मीहरूलाई भने बाहिरै रोकेका थिए । विमानस्थलमा अवतरण गर्दै गरेका प्रचण्ड र उनको स्वागतका लागि पुगेका उच्चस्तरका नेताहरूको तस्वीर खिच्न पुगेका सञ्चारकर्मीलाई माओवादीका स्थानीय कार्यकर्ताले धावनमार्ग प्रवेश गर्ने गेटमैं रोकेका थिए ।
आफ्ना नेता तथा कार्यकर्तालाई छानीछानी गेटभित्र प्रवेश गराइरहेका भोजपुरा राज्य समिति सदस्य मीनप्रसाद आपागाईंले सञ्चारकर्मीलाई भित्र जान नमिल्ने भन्दै गेटमैं रोकेका थिए । उनले सञ्चारकर्मीलाई गेट बाहिरबाटै तस्वीर खिच्न आग्रह गरेका थिए ।
फूलमाला बोकी स्वागतका लागि पुगेका कार्यकर्तालाई सहजै प्रवेश गराए पनि सञ्चारकर्मीलाई भने भित्र जान रोक लगाएको महेश्वर अधिकारीले बताए । उनले भित्र प्रवेश गर्न अनुरोध गर्दा समेत नमानेपछि प्रहरीले गेटभित्र प्रवेश गराएको जानकारी दिए ।
