 |
| सबैभन्दा बढी पदक जित्ने पुरुष र मिहिला शैलेश राणा तथा श्रेया धिताल । फोटो: आरके पटेल |
 |
| १६ औं राष्ट्रिय पौडी प्रतियोगिताको दृश्य । फोटो: आरके पटेल |
छैटौं राष्ट्रिय खेलकुद प्रतियोगिता अन्तर्गत वीरगंजमा आज सम्पन्न पौडी प्रतियोगितामा मध्यमाञ्चलले सबै २७ स्वर्ण हात पारेको छ । यसैगरी २५ रजत र २५ कास्य पदक पनि जितेको छ । चार सय मिटर रिलेमा महिला र पुरुषतर्फ पश्चिमाञ्चलले दुई रजत र पूर्वाञ्चलले दुई कास्य पदक मात्र जितेका छन् । मध्यमाञ्चलका तर्फबाट शैलेश राणाले ९ स्वर्ण, ४ रजत लिन सफल रहे । त्यस्तै शिरीष गुरुङले ३ स्वर्ण, ३ रजत र २ कास्य प्राप्त गरेका छन् । बनिन शहंशाह श्रेष्ठले १ स्वर्ण, २ रजत प्राप्त गरेका छन् । यसैगरी महिलातर्फ मध्माञ्चलकी श्रेया धितालले ८ स्वर्ण, ३ रजत प्राप्त गरिन् भने शैला राणाले ४ स्वर्ण, ६ रजत र १ कास्य प्राप्त गरेकी छन् । सोनरा विष्टले १ स्वर्ण, १ रजत र ३ कास्य जितिन् भने करिश्मा कार्कीले १ मात्र स्वर्ण प्राप्त गरेको बताइएको छ ।
आज अन्तिम दिनको प्रतिस्पर्धामा महिलातर्फ ५० मिटर बटरफ्लाइमा श्रेया धितालले ३४:७७ सेकेन्डका साथ स्वर्ण प्राप्त गरिन् भने शैला राणाले रजत र ओशिना भारतीले कास्य पदक जितेकी थिइन् । पुरुष ५० मिटर बटरफ्लाइमा शैलेश राणाले २९:९७ सेकेन्डका साथ स्वर्ण हात पारे भने प्रसिद्धजंग शाहले रजत र मनीष चित्रकारले कास्य पदक जितेका थिए । महिला ५० मिटर ब्रेस्ट स्ट्रोकमा शैलाले ४४:०७ सेकेन्डका साथ स्वर्ण, श्रेयाले रजत र सोनिरा विष्टले कास्य जितिन् । पुरुष ५० मिटर ब्ेरस्ट स्ट्रोकमा शैलेश राणाले ३३:५२ सेकेन्डमा निर्धारित दूरी पार गर्दै स्वर्ण हात पारे भने बनिन शहंशाह श्रेष्ठले रजत र प्रवेश अधिकारीले कास्य पदक जिते । महिला तर्फको ५० मिटर ब्याक स्ट्रोकमा श्रेया धितालले ३८:४७ सेकेन्डमा स्वर्ण हात पारिन् भने शैला राणाले रजत र जित्वेली महर्जनले कास्य पदक जितिन् । पुरुषतर्फको ५० मिटर ब्याकस्ट्रोकमा शैलेशले ३४:४४ सेकेन्डका साथ स्वर्ण, प्रकाश अधिकारीले रजत र मनीष चित्रकारले कास्य पदक जिते । महिला तर्फको ५० मिटर फ्रिस्टाइलमा श्रेया धितालले ३२:५८ सेकेन्डमा स्वर्ण जितिन् भने शैला राणाले रजत र ओशिना भारतीले कास्य पदक हात पारेकी थिइन् । पुरुषतर्फको ५० मिटर फ्रि स्टाइलमा शैलेशले २८:१२ सेकेन्डका साथ स्वर्ण, प्रसिद्धज· शाहले रजत र शिरीष गुरुङले कास्य पदक जितेका थिए । चार सय मिटरको फ्रिस्टाइल रिलेमा मध्यमाञ्चलका श्रेया, शैला, ओशिना र अदिती धितालको समूहले पाँच मिनेट २९:१९ सेकेन्डका साथ स्वर्ण जिते भने पश्चिमाञ्चलका रोजिना वाङमोलामा, पूजा अर्याल, मेहन्दो शेर्पा र अनिशा घलेको समूहले रजत र पूर्वाञ्चलका पासाङल्हामु शेर्पा, आस्था प्रधान, फुर्वाफुटी शेर्पा र ददोमा शेर्पाको समूहले कास्य पदक जितेका थिए । चार सय मिटर फ्रिस्टाइल पुरुषतर्फ मध्यमाञ्चलका शिरीष, शैलेश, प्रवेश र प्रसिद्धको समूहले चार मिनेट ४१:४० सेकेन्डमा दूरी पार गर्दै स्वर्ण जिते भने पश्चिमाञ्चलका शिरीष थापा, दिपेन राना, समृद्ध प्रधान र राजु नेपालको समूहले रजत र पूर्वाञ्चलका मुकेश राई, मनसुन भुजेल, तेन्जिङ राजवा र सूर्य राईको समूहले कास्य पदक जितेका थिए ।
आज एक समारोहबीच छैटौं राष्ट्रिय खेलकुद प्रतियोगिता अन्तर्गत वीरगंजमा विगत तीन दिनदेखि जारी १६ औं पौडी प्रतियोगिताको समापन भएको छ । समापन समारोहमा पर्साका सहायक प्रजिअ चिरञ्जीवी अधिकारी, नेपाल पौडी सङ्घका अध्यक्ष अशोक बज्राचार्य, महासचिव जगतमान श्रेष्ठ, वीरगंजका पूर्व नगरप्रमुख विमलप्रसाद श्रीवास्तव, पौडी सङ्घ पर्साका अध्यक्ष निमा लामा र जिल्ला खेलकुद विकास समिति पर्साका अध्यक्ष अमिताभ दास बच्चनले विजयी पौडीबाजहरूलाई मेडलसहित पुरस्कृत गरेका थिए ।
