 |
| महावाणिज्य दूतावास वीरगंज परिसरमा आज आयोजित भारतको गणतन्त्र दिवसको विभिन्न तस्वीर । झन्डोत्तोलनका पछि महावाणिज्यदूत आशुतोष अग्रवाल (बायाँ), नृत्य गर्दै विद्यार्थीहरू । इन्सेटमा आशुतोष अग्रवाल । फोटो : प्रवीण मानन्धर |
भारतको ६३ औं गणतन्त्र दिवस आज वीरगंजस्थित भारतीय महावाणिज्य दूतावासको कार्यालयले विभिन्न कार्यक्रमको आयोजना गरी मनाएको छ । बिहान महावाणिज्य दूतावासको कार्यालयमा महावाणिज्यदूत आशुतोष अग्रवालले झन्डोतोलन गरेका थिए । उनले सो अवसरमा भारतका राष्ट्रपति प्रतिभा देवी सिंह पाटिलले राष्ट्रको नाममा दिएको सन्देश वाचन गरी सुनाएका थिए । सोही अवसरमा विभिन्न विद्यालयका विद्यार्थीहरूले भारतको राष्ट्रिय गीतहरू गाएका थिए ।
गणतन्त्र दिवसको अवसरमा परम्परागतरूपमा वाणिज्य दूतावासले वितरण गर्दै आएको एम्बुलेन्स वितरण गरिएको थियो । महावाणिज्यदूत अग्रवालले जिल्ला अस्पताल मल·वा, नेपाल मुस्लिम समाज जनकपुर, उपस्वास्थ्य चौकी बासामाडी मकवानपुर, उपस्वास्थ्य चौकी जीतपुर बारा, भारतीय भूतपूर्व सैनिक सङ्घ पीठुवा, चितवनलाई एम्बुलेन्सको चाबी हस्तान्तरण गरेका थिए । गणतन्त्र दिवस कार्यक्रमको सञ्चालन वाणिज्यदूत पी. शशिकुमारले गरेका थिए ।
यसैगरी गणतन्त्र दिवसको अवसरमा महावाणिज्यदूतावासले होटल भिस्वामा आयोजना गरेको दिवाभोजमा सभासद्, प्रहरी प्रशासनका प्रमुख, पर्सा–बाराका राजनीतिक दलका प्रतिनिधि, उद्योगी–व्यापारी, शिक्षक प्राध्यापक, कानुन व्यवसायी, सञ्चारकर्मी, विद्यार्थीहरूको उपस्थिति थियो ।
यसैबीच ६३ औं भारतीय गणतन्त्र दिवसको अवसरमा आज नेपाल भारत सहयोग मञ्च पर्साले वीरगंजमा चियापान आयोजना गरेको थियो । वीरगंज उद्योग वाणिज्य सङ्घमा क्षेत्रीय प्रशासक माघवप्रसाद रेग्मीको प्रमुख आतिथ्यमा आयोजित चियापान समारोहमा पर्साका प्रहरी उपरिक्षक रमेश खरेल, वीउवासङ्घका अध्यक्ष अशोक टेमानी, रेडक्रसका केन्द्रीय सदस्य श्याम पोखरेल, जिविसका पूर्व सभापति जनार्दन सिंह क्षत्री, सत्यनारायण मित्तल, उमेशचन्द्र ठाकुर र महावाणिज्यदूतवासका महावाणिज्य दूत आशुतोष अग्रवाल, पी. शशिकुमार, प्रशान्त देशपाण्डे, एसडी मेहता, विनयकुमार सिंहलगायतको उपस्थिति थियो ।
