लोडसेडिङ र ग्यास अभावले सरस्वती पूजा पनि प्रभावित

सरस्वती माताको मूर्तिमा श्रीपञ्चमीको अवसरमा पूजाअर्चना गर्दै
निजगढका विद्यार्थीहरू । फोटो: जीतलाल श्रेष्ठ

प्रस, वीरगंज, १४ माघ/
    लोडसेडिङका साथै पेट्रोलियम पदार्थ र खाना पकाउने ग्यासको अभावका कारण पर्सा जिल्लामा धूमधामका साथ मनाइँदै आएको सरस्वती पूजा यसपालि प्रभावित भएको छ ।
    विद्यालय र क्याम्पसमा अध्ययनरत विद्यार्थीहरूले श्रद्धा र आस्थाका साथ मनाउने यो पर्व पर्सा जिल्लामा देशका अन्य ठाउँभन्दा भिन्न किसिमले मनाइने गरिन्छ । सरस्वती भएको मठमन्दिरमा गएर पूजाअर्चना गर्नुका साथै विद्यालय र क्याम्पसका अलावा शहर र गाउँको टोल–टोलमा माटोबाट बनाइएका सरस्वती माताको कलात्मक मूर्ति स्थापना गरी भव्य सजावटका साथ पूजाअर्चना गर्ने गरिन्छ । सरस्वती पूजाको नाउँमा शहरदेखि गाउँसम्म सयौं ठाउँमा चन्दा माग्ने कार्य यसपालि पनि यथावत् रह्यो । त्यस्तै मूर्तिहरू पनि विगतभन्दा थोरै बिक्री भएको छ । सरस्वती पूजाको शहर र गाउँमा विगतको जस्तै रौनक भने यसपटक देख्न पाइएन ।
    गतवर्ष शहर र गाउँमा गरिने सरस्वती पूजास्थलमा हिन्दी चलचित्रका चल्तीको गीत खुबै गुञ्जायमान भएपनि यसपटक गुञ्जन पाएन । १४ घण्टे लोडसेडिङको कारण अधिकांश सरस्वती पूजास्थलमा यसपटक माइक र म्युजिक सिस्टमहरू लगाइएको थिएन । शान्त वातावरणमा शहर र गाउँमा सरस्वती पूजा सम्पन्न भएको छ । लोडसेडिङका कारण गीत बज्न पाएन भने पेट्रोलियम पदार्थ र ग्यासको अभावले मिठाइहरू बन्न सकेन । मटीतेल र ग्यास अभावले विगतमा गरिने भोजभतेर पनि यसपालि भएन । प्रसादको लागि फलफूल नै वितरण गरिएको थियो ।
प्रस, कलैया/
    विद्याकी देवी सरस्वतीको पूजा गरी बारामा श्रीपञ्चमी पर्व शनिवार  धूमधामका साथ मनाइएको छ । कलैयालगायत बाराको ९८ गाविसका निजी तथा सरकारी विद्यालयका विद्यार्थीहरूले हर्षोल्लासका साथ श्रीपञ्चमी पर्व मनाएका छन् । विद्यार्थीहरूले पण्डाल निर्माण गरी त्यसमा सरस्वतीको मूर्ति स्थापना गरेका थिए । सूर्य उत्तरतिर लागी दिन लामो हुने र आजदेखि बसन्त ऋतु प्रारम्भ भएकाले श्रीपञ्चमीलाई बसन्त पञ्चमीसमेत भनिन्छ । आजका दिन बालबालिकालाई अक्षरसमेत चिनाइन्छ ।
प्रस, निजगढ/
    श्रीपञ्चमी अर्थात् सरस्वती पूजा शनिवार विद्यार्थीहरूले धूमधामका साथ मनाएका छन् ।
    विद्यार्थीहरूले बिहानै स्नान गरी शुद्ध भई आ–आफ्ना विद्यालयमा प्राण प्रतिष्ठा गरिएका सरस्वतीको मूर्ति, फोटोमा पूजाआजा गरेका थिए । विद्याकी देवी सरस्वतीको पूजा आराधना गर्दा वर्षभरि मेहनत गरी अध्ययन गरिएको विद्या कहिल्यै नभुल्ने र पठनपाठनमा मन लाग्ने विद्यार्थीहरूमा आस्था रहेको पाइन्छ । निजगढ, रतनपुरी, भरतगंजसिगौल, डुमरवाना, कोहल्वी, सपही, अमलेखगंज गाविसका सम्पूर्ण विद्यालयहरूमा धूमधामका साथ सरस्वती माताको पूजा गरिएको छ । सरस्वती पूजालाई विद्यार्थी एवं शिक्षकशिक्षिकाबीच सुमधुर सम्बन्ध बढाउने पर्वका रूपमा समेत लिने गरिन्छ । पूजापछि प्रसाद वितरण गरी   विद्यार्थीहरूले विद्यालयमैं सामूहिकरूपमा मिष्ठान्न भोजन गर्ने हुँदा विद्यार्थीहरूबीच एकापसमा मित्रता प्रगाढ हुने गरेको पाइन्छ । सामूहिकरूपमा मनाइने सरस्वती माताको पूजाआजा विद्यालयजीवनमा विद्यार्थीहरूले कहिल्यै बिर्सन नसकिने क्षणको रूपसमेत रहने पूर्वविद्यार्थीहरू बताउँछन् । श्रीपञ्चमीको अवसरमा विद्यालयहरूमा सांस्कृतिक कार्यक्रमको समेत आयोजना गरिन्छ ।