विश्वकप क्रिकेट ‘गर कि मर’

    भारतीय उपमहाद्वीपमा जारी आइसिसी विश्वकपको लिग चरणका सम्पूर्ण खेलहरू विधिवत सम्पन्न भइसकेको छ र अब सुपर ८ अर्थात् क्वाटरफाइनलका खेलहरूको रोमाञ्च चरम हुनेछ। यसमा कुनै पनि राष्ट्रले दोस्रो मौका नपाउने हुँदा अबका खेलहरूमा गर या मरको स्थिति रहने छ। यसै क्रममा भारतको अहमदाबाद स्थित मोटेरा रङगशालामा आयोजक राष्ट्र भारत र चारपटक विश्वकप उचालिसकेको अस्ट्रेलियाबीच खेलमा सबै खेल प्रेमीहरूको आँखा रहने छ। भारतमा क्रिकेटलाई धर्मको रूपमा लिइन्छ। त्यसमा पनि विश्वकपमा आफ्नो टोली फाइनलमा पुगी आफ्नै घरमा विश्वकप उचाल्ने सौभाग्य प्राप्त गरोस् भन्ने चाहना सम्पूर्ण भारतीयको मनमा रहेको छ। तर भारतले लिग चरणमा देखाएको उतारचढावपूर्ण खेल कौशलको कारण कतिपय भारतीय क्रिकेट प्रेमीहरूको मन आजको खेलले गर्दा अलि हच्किएको हुन सक्छ। यद्यपि भारतसँग क्रिकेटको भगवान मानिने सचिन तेन्दुलकर र कुनै पनि खेललाई आफ्नो धुवाँधार ब्याटिङले मोड्न सक्ने क्षमतावान खेलाडी वीरेन्द्र सहवागको साथले गर्दा भारतीय टोली अपेक्षाकृत यस विश्वकपमा बलियो मानिएको छ। मध्य क्रममा विराट कोहली, युसुफ पठान, युवराज सिंह र क्याप्टेन महेन्द्र सिंह धोनिको ब्याटबाट रन निस्केमा जस्तोसुकै टोलीको बलिङको धारमा खिया लाग्न सक्छ। तर भारतीय टिमले आफ्नो बलिङमा सुधार ल्याउन नसक्नु यस विश्वकपको ठूलो चिन्ताको विषय भएको स्वयं क्याप्टेन महेन्द्र सिंह धोनीले स्विकार्दै आएका छन्। इङ्गल्यान्ड सँगको खेलमा बलिङले गर्दा नै भारतीयहरूले बराबरीमैं चित्त बुझाउनु परेको कटु यथार्थ विद्यमान नै छ। यद्यपि अस्ट्रेलियाको लय बिगार्दै आइरहेको टर्वनेटरका नामले परिचित हरभजन सिंहजस्ता स्पिनरको साथ भारतीयसँग छ। यस्तै आर.आसविनको स्पिनको धारले पनि अस्ट्रेलियन क्रिकेट टीमलाई केही गार्‍हो पुर्‍याउन सक्ने संभावना रहेको भए पनि ओपनिङ बलिङमा जहिर खानलाई साथ दिने फास्ट बलर कोही पनि जम्न नसकेकोले भारतीय खेमा केही चिन्तित छ। तर क्रिकेटको अनिश्चिततालाई मनन गर्ने हो भने यस खेललाई मिनी फाइनलको रूपमा लिइने कुरा क्रिकेट पण्डितहरू बताउँछन्।
    उता पन्टरका नामले परिचित रिकि पोन्टिङको टिम पनि भारतसँग नकआउट चरणमा खेल्न धेरै उत्साहित छ। अस्ट्रेलियन टिमका सशक्त खेलाडी माइक हसीको कुरा मान्ने हो भने हामीसँग ग्लेन मेग्रा, सेन वार्नजस्ता खेलाडी नभए तापनि हामीले भारतलाई हराउने क्षमता राख्छौं। तर क्याप्टेन रिकि पोन्टिङको चिन्ता सचिन तेन्दुलकरमैं आएर अडिन्छ । उनी जस्तो महान ब्याट्सम्यानलाई रोक्नु धेरै कठिन हुन्छ तर पनि उनको लागि एउटा उत्कृष्ट योजनाको साथमा हाम्रो टोली उत्रने छ, जसमा हामी सफल हुने छौं उनी भन्छन्। स्पिन आक्रमणलाई कमै झेल्न सक्ने खेलाडीहरूको बाहुल्य रहेको अस्ट्रेलियन टिमको ब्याटिङको लय बिगार्न भारतीय क्याप्टेन महेन्द्र सिंह धोनी तीनजना स्पिनरको साथमा उत्रिन सक्ने सम्भावना रहेको छ। यद्यपि हरभजन सिंह आफ्नो क्षमताअनुसार बलिङ गर्न सकिरहेका छैनन् भने पियुष चावला पनि विगत दुई खेलदेखि बेन्चमैं छन्। यस्तोमा धोनीको रणनीति कस्तो हुने हो त्यो भने उनले आफ्नो फाइनल ११ टोलीको घोषणापछि नै थाहा हुनेछ। यता पाकिस्तानसँग १९९९ पछि पराजित भएको डिफेन्डिङ च्याम्पियन अस्ट्रेलिया एकाएक अत्तालिएको छ। पाकिस्तानको कसिलो बलिङका अगाडि घुँडा टेकेको अस्ट्रेलियन टिमले यस्तै परिदृश्य भारतसँग पनि देख्न नपरोस् भन्ने चाहना अस्ट्रेलियन फ्यानहरूको छ। अस्ट्रेलियासँग सेन वाट्सन, ब्राडन हेडिन, माइकल क्लार्क, माइक हसी र स्वयं रिकि पोन्टिङजस्ता ब्याट्सम्यानहरूको साथ रहेको छ भने बलिङतर्फ ब्ेरट ली अहिलेसम्म उत्कृष्ट लयमा छन्। यस्तै उनलाई साथ दिन मिचेल जोन्सन, स्मिथ र अलि महँगो साबित भए तापनि सोन टेटको पेसको अगाडि भारतीय खेलाडीहरू केही आत्तिन सक्ने सम्भावना भने पक्कै छ। १९८३ मा कपिल देवले विश्वकप उचाल्दा सचिन तेन्दुलकर मात्र १० वर्षका थिए। त्यसपछि भारतीयहरू विश्वकपको कहिल्यै नजिक पुग्न नसकेको कटु यथार्थलाई यसपटक पर सार्दै सम्भवत: अन्तिम विश्वकपमा पदार्पण गरिरहेका क्रिकेटका मिथक सचिन तेन्दुलकर आफ्नै घरमा भइरहेको क्रिकेट ट्रफी उचाल्ने मन बनाइसकेका छन्। त्यसले गर्दा पनि नकआउट चरणमा कुनै पनि टोली आए आफूलाई कुनै फरक नपर्ने तेन्दुलकर बताउँछन्। हामीले अबको खेलमा आफ्नो सुधारिएको प्रदर्शन गर्नु आवश्यक रहेको बताउँछन् सचिन तेन्दुलकर। आयरल्यान्ड र इङ्गल्यान्ड बीचको म्याच यस्तै साउथ अफ्रिका र भारतबीचको म्याचको रोमाञ्चलाई फर्केर हेर्ने हो भने आज भारतीय समय अनुसार २:३० मा हुने यस म्याचमा विश्वभरकै क्रिकेट प्रेमीको नजर रहनेमा कुनै शङका नहोला।