आरके पटेल, ११ फागुन/
बारा मालपोत कर्यालयमा कार्यरत नायब सुब्बा माधव थापाको हत्याको विरुद्ध पर्सालगायत अञ्चलका सम्पूर्ण सरकारी कार्यालय तीन दिनसम्म बन्द गर्ने विभिन्न कर्मचारी सङगठनहरूले आज प्रेस विज्ञप्तिी जारी गरी जनाएका छन्।
जिल्लामा रहेका विभिन्न कर्मचारी सङगठनहरूले प्रमुख जिल्ला अधिकारी नागेन्द्र झालाई आज ज्ञापन बुझाउँदै सो कुरा जनाएका छन्। प्रमुख जिल्ला अधिकारीमार्फत् प्रधानमन्त्री समक्ष सो ज्ञापनपत्र बुझाएको स्थानीय निकाय कर्मचारी युनियनका जिल्ला अध्यक्ष मङ्केश्वर ठाकुरले बताएका छन्।
मृतकलाई शहीद घोषणा, २० लाख क्ष्तिपूर्ति, परिवारलाई सरकारी नोकरी लगायत दोषीलाई पक्राउ गरी कारबाईको माग ज्ञापनपत्रमा उल्लेख गरिएको छ। निजामती कर्मचारी युनियनका अध्यक्ष सच्चिदानन्द सिंहले ज्ञापनपत्र बुझाएका थिए। हत्याराको पहिचान भइसकेको छ, हाम्रो जिल्ला नभएपनि हामीले आफ्नो अनुसन्धानबाट हत्याराबारे बाराका प्रमुख जिल्ला अधिकारीलाई जनकारी गराई सकेको कुरा ज्ञापनपत्र बुझ्दै प्रजिअ झाले आज बताए। नेपाल कर्मचरी सङगठनका अध्यक्ष सुबदार यादव, राष्ट्रिय कर्मचारी सङगठनका अध्यक्ष अलाउद्दिन अंसारी, सचिव हकहित सरक्षण मञ्चका मदनमोहन माली, स्वतन्त्र कर्मचारी सङगठनका धु्रव चौरसियालगायतले संयुक्त हस्ताक्षर गरी ज्ञापनपत्र बुझाएका हुन्।
कलैया /
कर्मचारी एवं स्थानीय बासिन्दाले जिल्ला मालपोत कार्यालय बाराका नायब सुब्बा कलैया–१० निवासी माधव थापाको हत्यारालाई कारबाई गर्न माग गर्दै बुधवार प्रदर्शन गरेका छन्।
आक्रोशित जनसमूहले मृतक थापालाई शहीद घोषणा गर्न माग गर्दै थापाको शवसहित नगर परिक्रमा गरेका थिए। प्रदर्शनकारीले जिल्ला प्रशासन कार्यालय अगाडि करिब दुई घण्टा सडक अवरुद्ध समेत गरे । यसैबीच संयुक्त विज्ञप्तिमार्फत् शाान्ति सुरक्षा कायम गर्नुपर्ने, कर्मचारी तथा सर्वसाधारणलाई सुरक्षाको प्रत्याभूति दिनुपर्ने, मृतकलाई शहीद घोषणा गर्नुपर्ने विभिन्न कर्मचारी सङ्घ–संस्थाले माग गरेका छन्।
विज्ञप्तिमा थापाको अश्रित परिवारलाई २० लाख क्षतिपूर्ति दिनुपर्ने, मालपोत कार्यालय बारामा थापाको सालिक निर्माण गर्नुपर्ने, परिवारका एक सदस्यलाई रोजगार दिनुपर्ने माग गरेका छन्। संयुक्त विज्ञप्ति जारी गर्नेमा नेपाल निजामती कमचारी सङगठन, नेपाल निजामती कर्मचारी युनियन, नेपाल राष्ट्रिय कर्मचारी सङगठन, नेपाल मधेसी निजामती कर्मचारी मञ्च, नेपाल स्वास्थ्यकर्मी युनियन, नेपाल प्रगतिशील जनस्वास्थय कर्मी, सङ्घ, पेशागत महासङ्घ नेपाल, नेपाल शिक्षक युनियन, नेपाल वित्तीय कर्मचारी सङ्घ, नेपाल, गाविस हकहित संरक्षण केन्द्र, एन. प्याब्सन नेपाल, नेपाल सिएमए सङ्घ तथा स्थानीय कर्मचारी सङ्घ रहेका छन्।
संयुक्त विज्ञप्तिमार्फत् उनीहरूले अनिश्चितकालका लागि कार्यालयमा कामकाज ठप्प पारेका छन्। यसैबीच नेपाल तरुण दल बाराका अध्यक्ष लुकेश सिंह एवं नेपाल मजदुर किसान पार्टी बाराका अध्यक्ष मुक्ति यादवले हत्या–हिंसा रोक्न माग गरे। उनीहरूले कर्मचारी आन्दोलनप्रति ऐक्यबद्धता जनाएका छन्। मृतक थापाका आश्रित ४५ वर्षीया पत्नी अनु थापा, २३ वर्षीया छोरी ज्योति थापा, १८ वर्षीय छोरा आशिष थापा, १५ वर्षीया छोरी माला थापा, १४ वर्षीया छोरा आदित्य थापा रहेका छन्। घटनाको अनुसन्धान जारी रहेको र हत्यारालाई कारबाई गरिने बाराका प्रमुख जिल्ला अधिकारी वसन्त उपाध्यायले जनाए। घटनाको अनुसन्धानको लागि पाँचजनालाई नियन्त्रणमा लिएको प्रहरीले जनाएको छ। थापाको हत्याको जिम्मा अखिल तराई मुक्ति मोर्चाका केन्द्रीय सदस्य एवं बारा जिल्ला इन्चार्ज सुल्तान मिर्जाले लिएका थिए।
रौतहट
मालपोत कार्यालय बाराका नायब सुब्बा माधव थापाको हत्या भएको विरोधमा आज नेपाल निजामती कर्मचारी सङगठनलगायत सम्पूर्ण कर्मचारी सङ्घ सङगठनले जिल्लाका सरकारी कामकाज ठप्प गरेको छ। विभिन्न कर्मचारी सङ्घ, सङगठन, युनियनले प्रेस विज्ञप्ति प्रकाशित गरी हत्याको विरोधमा कामकाज ठप्प गरेका हुन्।
विज्ञप्तिमा शहीद घोषणा, शहीद परिवारलाई सम्पूर्ण सुविधा उपलब्ध गराउन र दोषीमाथि कडा कार्यवाही गर्न नेपाल सरकारसँग जोडदार माग गरिएको छ। सरकारी कामकाज ठप्प भएकोले गौर सदरमुकाम आज सुनसान देखिएको थियो।
